Shillong, June 8: Meghalaya Energy Corporation Limited (MeECL)-ni mitam distribution circle-rangko REC-PDCL-na pakwate on·skana manchianiko dingtang dingtang dolrang jegaltokengon, iani bidingo a·dok sorkari Budbar salo bon·kame chanchirimangenba ja·kuko de·angna sienga.
MeECL-ni distribution circle-rangko REC-PDCL-na on·gija Atma Nirbhar-ni gong kror 1345 loan-ko man·na gita chu·gimik tangka paisarangko dakchake on·china, Mongolbar salo a·dokni Power Minister James K Sangma, MeECL-ni Chairman baksa a·dokni Chief Minister Conrad K Sangma-ko gronge didiangahachim.
Tom·a matchotani ja·mano Chief Minister-ni video gita parakatani gitade, Atma Nirbhar loan-ni gnigipa bakko on·anio REC-PDCL-sa, MeECL-ni distribution circle-rangko ra·skana gita niamko donahachim.
Ia gong kror 1,345-ni loan-na chu·gimik tangka paisani gita dakchakaniko on·ani bidingo MeECL-ni CMD aro Power department-ba batanggimin jagittam jabrimangna chanchirimahachim ineba Chief Minister parakataha.
Iako Finance department-ona ra·angon, ia loan-ni chu·gimik bojako a·dok sorkari aro Finance department-san chilaigija mitam bakkode MeECL-naba on·na miksonge, ia loan-ko chotpilna gita komibeoba 25 percent-kode dingtang dingtang cholrangchi ba bakrime gamskana tik ka·aha ine Chief Minister parakatenba, ianosa MeECL-ni mitam distribution circle-rangko chalaiskana REC bi·aha ine talatangaha.
“Ia loan-ni chu·gimik grorangko sorkari chotpile on·na ku·rachakgenchimode REC-na distribution circle-rangko pakwate on·na nangjawa indiba da·o bilsi 10-ni gisepo sorkari, gong kror 580 tangkarangko gamna nangskagen. MeECL-ni mitam distribution circle-rangko REC-na pakwate on·skagenchimode sorkari, tangka paisani gita indita neng·nikanirangko man·skana nangjawachim,” ine Chief Minister parakataha.
MeECL-ni loan-ko Finance department, chu·gimik gamskana ku·rachakgenchimode MeECL-ko chalaianio kamrangko namdapatna gita MeECL-ba niamrangko ra·chakskana nangao ga·akgen ineba Chief Minister aganaha.
Indake ong·engon, Budbar salni 12:30 bajimango Cabinet tom·e iani bidingo bon·kame chanchianggen aro nangani kri ja·kuko de·angskana sienga.
