Shillong, April 28: Meghalaya Commercial Truck Owners and Driver Association dolrang Mairango donggipa Ladmeri Toll gateo kam ka•giparangni kosako badi ka•doangaha ine Bristibar salo u•iataha. Re•anggipa April jani 6 tariko gari salgipa John Syiemlieh minggipa Toll gateo nanggipa tangka gong 200/-ko gamanahaoba tangka gong 200/- ko gamdaptaina aganaha. Jensalo Shiemlieh ua 200/- tangkako gamtaina jechakon gateo donggipa manderang gariko ro•ong gogrimaha aro driver bang•en mata-bu•ako man•beaha. Ia ong•a obostara un attamni 7:30 bajimango ong•ahachim ine Associationi ku•baltitimgipa Johanes Lamare kobor ra•timgiparangna aganaha. ” Pilak truck rangan toll gaterangna tangka gamna nanga ine chinga u•ia indiba ong•gija tangka gildrakani aro un walo 200 tangkako niamgri bi•drakaniara niam ong•ja. Un attamo ua driver kentimake gariko sale katahaon national highwayni rama pakmao chagakaha aro saknaako man•aha, indiba rasong gnangbee uni jonggipa uko dakchakaha aro Shillongni Woodland hospitalona uko ra•angaha. Uni gimin association iako chone ra•jawa aro iani gimin talbate sandirokaniko dakchina policerangko ge•etgen, aro iana mamingba kam ka•ani songjaode chinga gital ja•ku ga•aona sokanggen” ineba Lamare agandapaha.