Tura, Oct 30: Meghalaya State Football League-ko November aro December jani gisepo Tura-o sokachakna sienga aro ia kal•susaanio Meghalaya a•dok gimikonin robol kal•susagipa dolrang re•bae bakko ra•angna gita sienga.
Tura Football League 2022 ‘Super Division’-ni final ba bon•kamgipa kal•susaaniko Sonibar salo, Chipakkore Football Club aro Selsella Sports Association dolni gisepo kal•susaangaha aro ia bon•kamgipa kal•susaanio Chipakkore Football Club, Selsella Sports Association-ko goal 4-0-chi cheangahani gimin ia Meghalaya Football League-o Chipakkore FC, West Garo Hills a•jani pal kal•susaangskagen.
Chipakkore Football Club-na goal-rangko chipe on•anggipa manderangara, Siddartha Rabha aro Brojen Muchahary ong•a.
Ia Tura Football League ‘Super Division’-ko Tura-ni District Football Association, Tura-ni Chandmary kal•chakramo ong•atangaha aro ia robol kal•susaanio gimik dolchet robol kal•gipa dolrang bakko ra•angaha.
Ia Super Division-o Chipakkore Football Club chegipa ong•ahani gimin da•o November-December jarangni gisepo Tura-o ong•atna sienggipa Meghalaya Football League-o West Garo Hills a•jani pal kal•susaangskagnok.
Ia Super Division robol kal•susaanio Player of the Final-ni boksisko Chipakkore FC-ni Brojen Muchahary, Best Young Player-ni boksisko BOCA Junior-ni Saldish Momin, Golden Gloves-ni boksisko Selsella SA-ni Tengsan Sangma, Best Defender-ni boksisko Maram FC-ni Kenny Noel A Sangma, Top Scorer-ni boksisko Chipakkore FC-ni Brainsbirth Momin aro Player of the League-ni boksisko Selsella SA-ni Benja Marak-na on•angaha.
