Shillong, June 3: Re•baenggipa 2023 bilsini Meghalaya Legislative Assembly election-na skang, dingtang dingtang dolni dilgiparang Congress dolo napna sienggiparang donga ine Sukrobar salo, All India Congress Committee (AICC)-ni Meghalaya in-charge Manish Chatrath a•kangataha.
Chatrath-ni parakatani gitade, re•baenggipa bilsini Assembly election-na skang adita sak dilgiparang, Congress dolo napna nangnikenggiparang donga indiba da•o dipet ia dilgiparangko uamang jinmana parakna nangnikkujaenga.
“Meghalaya Assembly election-na da•o ja 7 ba ja 8-mangsan somoi dongaiaha aro ia election-na chinga dolni gita chanchisamsoanirangko dakmanaha. Election-na skang adita aiao inmangnirangba donggen maina Congress dolo napna sienggipa adita sak dilgiparangba donga. Indiba da•o dipet chinga uamangni bimingrangko parakna nangnikkujaenga,” ine Chatrath aganaha.
All India Trinamool Congress (AITC)-ni dilgipa Mukul Sangma-ko Indian National Congress (INC)-ona rimbapilna jotton ka•enga ine koborrangko man•sogipani bidingo sing•on, da•o dipet iani bidingo Congress-ko dilgiparangoni darangba ma•sia dongkuja ine AICC-ni dilgipa parakataha.
India a•songo gitchambatsranggipa political dol ong•e, re•baenggipa bilsio Congress dol, Meghalaya a•dokni pilak dam 60 constituency-rangon susagen ineba Chatrath parakataha.
Congress dolni candidate-rangko seokani bidingo sing•on, Congress dolo dingtang dingtang gadangrang donga aro ia gadangni krisa candidate-rangni bimingko seoke ja•mano AICC-na ra•chakna gita watatgen ine Chatrath parakataha.
Ra•galako man•gipa sakbonga MLA-rangni gimin sing•on, uamangoni darangba da•o dipet unbaksa agangrika dongja ine Meghalaya a•dokni AICC in-charge parakataha.
