Shillong, Dec 15: Meghalaya a·dokni Autonomous District Council (ADC) damgittamna Sombar salo a·dokni District Council Affairs (DCA) department, gong kror 45 tangkarangko chamataha.

Ia tangkarangko 15th Finance Commission, special plan assistance-ni ning·o a·dokni district council-rangna chame on·ataha.

“Ia bilsina special plan assistance-ni ning·o chamatgipa tangkarangoni 50 percent-ko chinga damgittam ADC-rangna on·atmanaha,” ine Meghalaya a·dokni DCA Minister Lahkmen Rymbui parakataha.

Rymbui-ni u·iatani gitade, ia gong kror 45 tangkarangoniko Khasi Hills Autonomous District Council (KHADC)-na gong kror 20.47, Garo Hills Autonomous District Council (GHADC)-na gong kror 18.20 aro Jaintia Hills Autonomous District Council (JHADC)-na gong kror 6.82 tangkarangko chamataha.

“Ia tangkarangko dingtangmancha namroro silroroatani kamrangna ia ADC damgittamni proposal-o pangchakesa special plan assistance-ni ning·o chame on·engani gimin district council-o kam ka·enggiparangni dormaharangko on·na gitade ia tangkarangko jakkalskana man·jawa,” ine DCA Minister talatangaha.

District council-rango kam ka·giparangni dormaharangko on·anide sorkarini daito ong·ja aro district council-rang an·tangtangan dormaharangko on·na gita tangka paisarangko man·na nanga ineba Rymbui parakataha.