Shillong, May 31: Meghalaya a•doko PM Poshan ba Mid Day Meal (MDM) Cook aro Helper-rangni dabianirangko sorkari knachakjaengani gimin jingjengatna gita ka•mikkenatangaha.
All Jaintia Mid May Meal Workers Union-ni adviser Khroo L Pariat-ni parakatani gitade, a•doko MDM Cook aro Helper-rangni dabianirangko knachakjaengani gimin a•songni Prime Minister Narendra Modi aro Meghalaya a•dokni Chief Minister Conrad K Sangma-na u•iatna gita uamang Mongolbar saloba okumu chake jingjengataniko dakangaha.
PM Poshan (MDM)-ni hajirarangko jaantian bank account gita on•enga ine a•dok sorkarini ma•mong sorkarina report on•aniara kakket ong•ja ineba Pariat parakataha.
MDM worker-rang bilsio changgnisan hajirako man•enga aro bilsiantian jagnide bangki dongrongenga ine janapatengon, MDM worker-rangna on•na nangenggipa tangka paisarangara bachi gimaskaenga ine Pariat sing•doangaha.
Mongolbar salo, MDM cook-rang, an•tangtangni hajirako bariatchina aro an•tangtangni man•na nangkuenggipa hajirarangko matchote on•china dabie, pring 9:00 bajioni attam 5:00 bajiona Shillong songjinmao okumu chake jingjengataha aro ia jingjengatanio a•dokni dingtang dingtang biaprangoni MDM Cook aro helper-rangba re•bae bakko ra•angtokahachim.
Meghalaya a•dok gimikni sak 14,000 MDM cook aro helper-rang, ia bilsini April 1 tarikon a•songni Prime Minister Narendra Modi-na a•dokni Governor Satya Pal Malik-ni jako memorandum-koba on•atahachim.
