Shillong, Sep 26: Meghalaya a•doko kamgri ong•e dongenggipa chadamberang batrorobaengani gimin re•baenggipa October-ni 21 tariko Federation of Khasi Jaintia & Garo People (FKJGP), jinma tom•e re•jomaniko ong•atenga ine parakataha.
FKJGP-ni president Dundee Khongsit-ni kobor ra•timgipa manderangna parakatani gitade, uamangni am•sandie nianio a•doko sak 1,60,000-mangni gita chadamberang kamgri ong•e dongna nangenga ine uamang nikaha aro iani bidingo FKJGP dolni gita re•baenggipa October-ni 21 tariko, Motphran-oni a•bachenge Malki kal•chakramona jinma re•jomaniko ong•atenga.
A•doko kamgri ong•e dongenggipa chadamberang batorobaengani gimin an•tangni suk ong•gijaniko parakatengon, dingtang dingtang department-rango bangbang ong•e dongenggipa kamrangko sorkari gapatna gisik nangjaengani giminsa kamgri ong•e dongenggipa chadamberang batororobaengaha ine FKJGP-ni president parakataha.
An•tangtangni neng•nikanirangko chadamberang ku•rang on•na man•na gita FKJGP, ia ja•kuko de•dilenga ineba Khongsit parakataha.
Contract basis-o kam ka•enggiparang kamni gita maming naljokanirangko man•jaengani gimin contractual post-rangko bon•atchina gitaba FKJGP dabiangaha.
Kamna manderangko ra•engon maming dongnuani gri ong•atchina gitaba FKJGP dabiangaha.
