Shillong, Mar 1: Meghalaya a•doko niam gri koela badinganiko sorkari champengna jotton ka•enga ine Mongolbar salo a•dokni Home Minister Lahkmen Rymbui parakatenba, Police department-o kam ka•giparang chu•ongjaengani a•sel kamrangko ka•sokjaenga ine talataniko on•angaha.
A•doko pilak ong•gija dakgipa kamrangko champengna sorkari jotton ka•enga ine janapatengon, Police department-o sak 1,800-mangni gita sipairang chu•ongjaengani a•sel police-rang, kamrangko ka•anio neng•nikanirangko man•enga ine Home Minister parakataha.
Police department-o ge 148-na baten kamrangko gapatna gita bakan advertisement ba u•iataniko on•gen ineba Rymbui parakataha.
Home Minister-ni aganani gitade, Police department-o sipairang chu•ongjaengoba a•doko ong•gija dakgipa pilak kamrangkon champengna rake kamrangko ka•enga.
A•doko koela badingenggipa manderang, bobil dake chakatgipa manderang baksa nangrime kamko ka•enga ine matnangenggipani gimin sing•on, da•o dipet iani bidingo ua maming report-ko man•a dongkuja indiba iako jegalnade man•jawa ine Rymbui parakataha.
West Khasi Hills a•jani koela a•damrango bobil dake chakatgipa manderang re•ruraenga ine matnanganirangna aganchakaniko on•angskaengon, da•o dipet iani bidingo police-rang ma•sina man•kujaenga ine Home Minister parakatskaaha.
Niam gri bikote tangka gile ra•enggipa check gate-rangko sorkari bon•atna jotton ka•enga ineba Home Minister parakataha.
