Shillong, March 21: Mukroh songara Meghalaya a·dok ning·o ga·akgipa songan ong·a ine Mongolbar salo, Meghalaya a·dokni Chief Minister Conrad K Sangma, Assembly-na talataniko on·angaha.
Assembly-ni budget session-o North Shillong MLA Adelbert Nongrum-ni sing·anina ua ia aganchakaniko on·angaha.
Mukroh songara Meghalaya a·dok ning·o ga·akmanchagipa songan ong·a aro iano maming jajaani dongja ine talataniko on·angengon, 279192 census code-o pangchake kakketko am·sandigenchimode Mukroh songara West Jaintia Hills a·jaon ga·aka aro ia songko MGNREGA-ni ning·o Laskein Block-ni VEC chana ine Chief Minister parakataha.
Chief Minister-ni parakatani gitade, election-ko ong·atanioba Mukroh A aro Mukroh B polling station-rang Mowkaiaw constituency-ni ning·on ga·aka aro Mukroh A-o sak 802 me·asarang aro sak 794 me·chikrang donga.
Mukroh songo Meghalaya a·dokchipakni Mukroh-A fair price shop-rango king 235 ration card-rang aro namgniko man·enggiparang sak 1285 donga aro Mukroh-B-o king 179 ration card-rang aro namgniko man·enggiparang gimik sak 944 donga ineba Chief Minister parakataha.
Sangma-ni parakatani gitade, Mukroh songo Mukroh government LP skul aro Mukroh health sub-centre-rangba donge manderangna namgnirangko on·enga.
March 17 tarikona kingking Mukroh VEC, king 502 job card-rangko on·aha aro ia jolrango songdongenggipa manderang a·dok sorkarini on·enggipa namgnirangko man·enga ineba Chief Minister parakataha.
