Tura, Feb 2: Opposition Trinamool Congress (TMC)-ni dilgipa aro a·dokni gitcham chief minister Mukul Sangma, an·tangni biaprangosan namroro silroroaniko ra·bana gisik nangaia aro darangnaba iandakgipa kamrangko suale on·na sikjani a·selan NPP sorkariko be·atna uni jotton ka·ani somoio darang MLA-rangan unbaksa bakrimtokjaha ine Bristibar salo, Meghalaya Assembly-ni Deputy Speaker aro Resubelpara-ni National People’s Party (NPP) MLA Timothy D Shira parakataha.
Bristibar salo ua, Bajengdoba-ni NPP MLA Pongseng Marak-na campaign ka·angani somoio jinmana aganprakengon, Mukul Sangma-ni CM ong·engmiting somoio gitcham Congress sorkarini gong crore 5000-ko loan ra·ani a·sel a·dokni manderangsa sud gnang tangka paisarangko chotpilna nangaha aro kacharirango case-rang ong·aha ine Shira matnangataha.
North Garo Hills a·jao rama jal·langrangko taridapna gita NPP sorkari, gong crore 80 tangkarangko chame on·aha aro Assam-ni sima jolo donggipa Damra-chipakni nosto ong·gimin kilometre 39 ramako tarina a·bachengengaha indiba TMC-ni dilgiparang, NPP sorkariko matnangkuenga ineba Shira parakataha.
Bang·bea tangka paisarangko loan ra·e manderangna neng·nikanirangko ra·baaha ine Mukul sorkariko matnangatengon, NPP sorkarini a·bachengatgipa FOCUS aro FOCUS Plus program-rangode iandakgipa grorang dongja aro ia program-ara manderangni janggi tangani gadangko namdapatna sorkarini dakchake on·enggipa program-sa ong·a ine Shira parakataha.
NPP-ni iandakgipa kamrangna manderangni kusi ong·aniko nike, TMC dolba manderangna tol·e ku·rachakenggipa ‘WE Card’ scheme-ko ra·baahachim indiba ia scheme-ko manderang da·on jegalsotokengaha ineba Shira parakataha.
Ganol hydel project-na Mukul sorkari, gong crore 500 tangkarangko koros ka·eba matchotatchipna man·jaha indiba ia kamko Conrad Sangma, gong crore 300-chin matchotate on·skana man·aha ineba Shira parakataha.
