New Delhi, June 23: Dingtang dingtang nangchongmotgipa cholrang dongjani gimin nokgri jamgri ong•gipa manderangkode COVID-19-ni tikana biming segatanio watchanggalaha ine badiaba badiaba songbadrango seaha aro mitamrangode ‘digital-ni gita bimingrangko segatna nangani a•sel’ ba ‘Bimingko segatna gita English ku•sikko nangani a•sel’ ba ‘Internet gita biming segatna computer aro phone’-rangko nangani a•sel’ tika su•na biming segatanio watchanggalako man•aha ine janapanirang gnang.
Indiba ia kattarangara pilakan kakket ong•ja aro pangchakani gri janapgipa kattarangsan ong•aia. Iachi indake talataniko on•na nangnikenga:
Chong•motan, COVID tikako su•na gita mobile phone dongna nanga katta ong•ja.
Tikako su•na gita dongchakani address ba biapko mesokna nangchongmota ong•ja.
Tikako su•na online gita Co-WIN-o biming segatchengna nangchongmota ong•ja.
Jakkalgiparang altubate ma•sina man•na gita da•o Co-WIN-ko ming 12 ku•sikrango man•engaha aro uarangara, Hindi, Malayalam, Tamil, Telugu, Kannada, Marathi, Gujarati, Odia, Bengali, Assamese, Gurumukhi (Punjabi) aro English ong•a.
Ia Co-WIN-ara, a•songni diltubatsranggipa biaprango donggiparangna aro cholgri ong•batsranggipa manderangna, internet gita COVID tikako sokate on•na aro tikani bidingo ma•siate on•na cholko on•enggipa IT system ong•a. Ia COVID tikako ra•na gita Aadhar, Elector’s Photo Identity Card, Photo Ration Card, Disability I.D. Card ba uandakgipa identity card-rangko nanggenchimoba India sorkari, iandakgipa identity card donggijagiparangna ba mobile phone donggijagiparangna tikarangko su•na gita cholrangko on•skaenga.
Iandakgipa cholrangko man•enganichi da•o lak 2-na baten manderang tikarangko su•e ra•na man•aha aro butchuma budeparang baksana be•enni gita cholgri ong•gipa manderangnaba India sorkari, May-ni 27 tarik dipetan nokni sepangon tika su•ani centre-rangko kulie on•engaha.
Je manderangan internet ba smart phone ba mobile phone-rangkoba jakkalpana chol ong•jachim, uandakgipa manderangnaba da•o pilak sorkari vaccination centre-rango maming tangka paisa gri, ua biapon re•kame biming segatna aro tikako su•e ra•na cholko on•engaha aro uandaken da•o dipet 80 percent tikarangkode centre-o biming segaten su•aha.
Da•o dipet COVID-19-ni tikako su•ani national average-ona bate tribal a•jarangon nambatenga ineba nikna man•aha. Sorkarini see rakkianiko parakani gitade, tika su•chakgipa centre-rangoni 70 percent-de dam 26,000-na baten primary health centre-rango ar0 dam 26,000 sub-health centre-rangko man•chape bang•bata centre-rangan songadam nokadamrangosa ong•enga.
