Shillong, Aug 29: National Sports Day-ko Meghalaya a·dok gimiko maniangaha aro adita salrangna skang ong·atgipa chang-6gipa Meghalaya Games-o bak ra·gipa sak 136 athlete-rang aro sak 22 coach-rangko mande ra·anirangko dakangaha. Ia manianiko dakanio, YESS Meghalaya-ni ning·o sak 103 bimung segatgimin manderangna Meghalaya sorkari lak 45-ni cheque-rangkoba sualataha.
Ia manianiko Department of Sports & Youth Affairs ong·atangaha, aro apsan somoion Shillong aro Tura-o manianirangko dake kal·susaanirangko bilakbatatna aro chadamberangni changa-sapanirangko namdapatna a·dokni on·kange kam ka·anirangko mesokangaha.
YESS Meghalaya-ko a·dokni skotong minister Conrad K. Sangma 2022 bilsio a·bachengate, chadambe dolrangna, society-rangna, aro NGO-rangna tangka-paisarangchi dakchakanirangko on·a. Ia progamme-ni ning·o dingtang dingtang mikrakatani campaignrang-ko ong·ate, skia-poraiani aro gipin kamrangko ka·e chadamberangko mikkangchi dilgipa ong·na dakchakna aro songsar-o bak ra·na tarisona miksongenga.
Shillong-o tom·anio jinmana aganengon, National Sports Day-ara be·enni mangrakani, darangkoba watchanggijani aro chadamberangko bil gnangatanina sorkari gisik nange kam ka·aniko gisik ra·atani ong·a ine Sports & Youth Affairs-ni Minister Shakliar Warjri parakataha. “Bang·a neng·nikanirangko man·genchimoba, 2018 bilsionin Department of Sports & Youth Affairs bang·a chu·sokanirangko man·engaha. Re·baenggipa Olympic Games-ona athlete-rangko watatna man·na ine miksonge chinga tarisamsoenga,” ine ua aganangaha.
Meghalaya Games-ni bilsianti chu·sokaniara a·doko kal·susaanirangni dal·roroani sakkiko mesoka ine Warjri janapaha. Uandake cholrangko namdapatna, professional coaching-ko on·na aro chadambe kal·susagiparangni gisepo bimchipani aro gisik nanganiko ra·bana sorkari krenge kamrangko ka·enga ine ua talataha. Uandake a·doko on·enggipa pilak cholrangko ra·china aro sorkari-ni programme-rango gisik nange bak ra·e an·tangtangni changa-sapaniko sandichina ine ua chadamberangna didianiko on·angaha.
Megha Fit Phase 1-ko a·bachengatani giminba Minister jinmana parakataha, aro iano be·enko mangrake rakkianina aro an·seng-baljoke janggi tanganiko ra·bana lak 20-na baten tangkarangko tikataha. Una agrevam chadambe kal·susagiparangna dongchakna dingtangmancha sports hostelrangko rikna sorkari kror 100 tangkarangko chammaha ineba ua parakataha. “Iano jakkalgipa tangkarangara bon·atgipa ong·ja indiba sports association-rangko aro chadamberangko bil gnangatna koros ka·anisa ong·a,” ine Warjri agandapaha.
Tura-o National Sports Day-ko manianio West Garo Hills a·jani Additional Deputy Commissioner, Nipon Hajong, MCS, re·bae bak ra·aha aro saksa sakgipin baksa nangrimani, an·seng-baljokani aro tom·tome janggi tanganina kal·susaanirangko dakna nangchongmota ine talate on·angaha.
Biap damgnion manianirango bak ra·na re·bagipa kal·susagiparang bimchipani, chakchikani aro namgipa kal·susagipa ong·anina ku·mikchetaniko dakangaha.
Na·simang iakoba nina man·gen:
Na·simang iakoba poraina man·gen: Tura-ni Boldak A·ding L.P.School-ko CM nirokea
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
Download our app from playstore – Northeast Media Hub
