Shillong, June 7: NEHU-o kam ka•enggipa manderangni dingtang dingtang dabianirangna university-ni Vice Chancellor, maming aganchakanirangko on•jaengani gimin All NEHU Workers Union (ANWU), Budbar sal dipet okumu chake jingjengatskana manchiangaha.
NEHU-o kam ka•enggipa manderangni dingtang dingtang nanganirangko chu•sokatchina dabie batanggimin salrangonin jingjengatanirangko dakengachim ine nikna man•a.
ANWU-ni president Napoleon Mawphniang-ni parakatani gitade, NEHU-o kam ka•enggipa casual worker-rangoni bang•batan bilsi 10-oni bilsi 30 ong•tokengahani gimin ia casual worker-rangkoba kamo regularise ka•china dabie uamang, NEHU-ni Vice Chancellor-na sedoatahachim. Indake ong•genchimoba NEHU-ni Vice Chancellor, iani bidingo maming aganchakanirangko on•skakujaengachim.
An•tangtangni kamko regularise ka•china dabie re•anggipa May 21 tarikoba ANWU, tom•tome jingjengatanirangko dakangahachim.
Iani bidingo ANWU-ni dilgiparang, re•anggipa April-ni 29 tarikon NEHU-ni Vice Chancellor-na sedoate, ia dabianirangko chu•sokatchina sal 30 somoiko on•angahachim ineba ANWU-ni president parakataha.
