Shillong, May 27: Meghalaya a•doko niam gri koela badingenga ine nikgenchimode aro iako official-ni gita sorkarina badi ka•e sedogenchimode, a•dok sorkari nanga gita ja•kurangko de•gen ine Sukrobar salo, a•dokni Chief Minister Conrad K Sangma, ku•rachakaniko on•angaha.
A•doko koelarangko badingna on•engon, nangchongmotgipa lekkarangko ra•bitchina gita sorkari, ge•etaniko on•manaha ineba Chief Minister parakataha.
Niam gri koela badinganina Assam-o rim•ako man•gipa mandeara, Cabinet Minister James K Sangma baksa apsan kam ka•rimgipa mandean ong•achim ine matnangenggipani gimin janapatengon, iani bidingo da•o dipet Assam sorkari, Meghalaya sorkarina maming u•iatani dongkuja ine Chief Minister parakataha.
“Kakketko ma•sichenggijade iandakgipa matnanganirangna anga mamingkoba aganchakna man•kujawa. Da•o dipet Assam sorkarioni chingna mamingkoba iani gimin u•iata dongkuja aro chingni agangimin gita pilak kamrangon chinga nangchongmotgipa lekkarangko ra•bitchina aganenga,” ine Sangma aganaha.
Manderangde jekoba skatang potchipna aro matnangna man•aia indiba nangchongmota ong•genchimode iani bidingo sorkari am•sandianirangko dakgen ineba Chief Minister parakataha.
