New Delhi, Jan 7: Jammu & Kashmir a•dokni song damsao dakchakaniko nangenggipa nokdang ge•sana Kupwara-ni Karalpura COB-o dongenggipa Army-rang dakchake on•anichi ia nokdango an•o dongenggipa me•chik, me•a bi•sako ba•na man•aha ine kobor on•aha.
Koborko on•ani gitade, January-ni 5 tarik walo konta 24-na dontongpilgija suuri ga•akengachim aro iandakmiting somoio walni 11:30 bajimango Kupwara-ni Pharkian minggipa songni Manzoor Ahmed Sheikh minggipa mande saksa, Karalpura COB-ni Army-rangna phone ka•ate, uni an•o dongenggipa jikgipa an•pakani somoi ong•engahani gimin ta•raken hospital-ona ra•angna nangengaha ine kobor on•ataha.
Ua somoio dontonggija suurirang ga•akengani gimin ua jolo sannaniko on•enggipa garirang aro manderangko salruragipa garirangba dongjachim aro uandaken ia me•chikni segipa mamingkoba dakna changgija dongengachim.
Ia mandeni koborko on•ata bakan Karalpura-ni army-rang, sannaniko on•gipa nurse-rang baksa ia mandeni nokona somoi gitan sokangaha aro an•o donggipa me•chikko de•e ja•skuona sokpilgipa suuri rama, jean kilometre gnimangni gita chel•achim, ugita re•ange ja•mano mongsonggipa ramaona sokangaha. Ua ramaoni ja•mano ia me•chikko Karalpura hospital-ona ra•angaha aro hospital-ona sokangon hospital-ni manderang uko rimchaksoe ja•mano ua an•senggipa me•a bi•sako ba•na man•aha ine u•iataha. Ia hospital-ni manderangna army aro civil administration-ni official-rang, skangan ia me•chikni bidingo u•iatsamsoahani gimin hospital-ona sokangon una namgipa sannanirangko on•aha.
Iandake nangan somoio songni manderangna dakchake on•ahani gimin ja•mano ua mande aro gipinrangba army-rangko mittelpilataha.
