Resubelpara, Oct 15: North Garo Hills a·jani District & Sessions Court gital nokko Sonibar salo, Meghalaya High Court-ni Chief Justice, Justice Sanjib Banerjee, Mendipathar-o nokdonggae on·angaha.
North Garo Hills a·jao judiciary-ko 2020 bilsini September 2 tariko, executive-oniko ma·ekatahachim aro uandaken da·o a·jao District & Sessions Court-ni gital nokko rike on·aniara, a·jao songdongenggipa manderangna kakket bichalko on·anio nambate kamrangko ka·na dakchakani ong·gnok.
Ia gital court building-ko nokdonggae on·angani somoio Meghalaya High Court-ni Chief Justice, jinmana aganprakangengon, kacharini daitorangko talatangenba, kacharini mongsongbatgipa daitoara manderangni bilko chel·chakani aro pilak gadangni manderangnan kakket bichalko on·anian ong·a ine aganaha.
A·songni namroro silroroanio me·chikrangni on·gilanirangko janapatskaengon, me·chikrangni kamrangkoba mittelpile, pilak kamrangon me·chikrangnaba apsan cholrangko on·ani somoi ong·aha ine Justice Banerjee aganaha.
North Garo Hills a·jao ia gital court building-ko rikna gita tangka paisarangko ta·raken on·atahani gimin ua ma·mong aro a·dok sorkarirangkoba mittelpilangaha.
Ia tom·anio Meghalaya a·dokni Law Minister, Dr M Ampareen Lyngdoh-ba jinmana aganprakangengon, a·dokni pilak kona noksikrangon manderangna kakket bichalko on·na gita gisiko nangbee kamrangko ka·engani gimin Meghalaya High Court-ni Chief Justice-ko mittelpilangaha.
Ia gital court building-ko matchote rikna gita gong crore 19.43 tangkarangko chamataha ine talatangengon, ia tangkarangoni 90 percent-kode ma·mong sorkarioni chamataha ine Law Minister parakataha.
Iana skang a·dokni Law Minister, North Garo Hills a·jani Sarangma-o donggipa Lay-By Market aro Dainadubi-o donggipa Sambrak state seed farm-koba niangjolaha.
Gital court building-ko nokdonggaani somoio Kharkutta-ni MLA Rupert Momin aro Mendipathar MLA Marthon J Sangma-ba dongpae jinmana aganprakengon, ia gital court building-na a·arangko on·gilahani gimin Mendipathar College-ni governing body-ko mittelpilangskaaha.
