Shillong, March 7: Meghalaya Legislative Assembly-o agan-chalaitimgipani biapko ra·na gita, NPP dolchi rikdilenggipa MDA 2.0 sorkari, North Tura-ni MLA aro skotong minister-ni Advisor gitcham Pa Thomas A Sangma-ko jinma namnikenba Sombar salo candidate-na mingangaha.

Ia apsan salon, NPP-ni gipin MLA-rangni dongpaanio Pa Thomas Sangma, Shillong, Assembly Secretariat-o Meghalaya Legislative Assembly-ni Commissioner Secretary, Andrews Simon-ni jako uni nomination lekkakoba on·angjolaha.

Indake ong·engon, Assembly-o agan-chalaitimgipani post-na eleksinko re·baenggipa April 9 tariko ong·atangnasienga.

Unomiting, a·dokni skotong minister Pa Conrad K Sangma, Meghalaya Legislative Assembly-o agan-chalaitimgipani biapko ra·na gita jinma namnike candidate-na mingako man·ani gimin Pa Thomas Sangma-na an·tangni namgipa sikanirangko on·atenba social media-o seachi parakataha.

An·tangni nomination lekkarangko on·ani ja·man kobor ra·timgiparangna aganangengon, Pa Thomas Sangma, skangni MDA sorkari uni consituency-ni manderangna dangdike on·na gita bang·a cholrangko on·aha ine aganangenba, an·tango ka·dongchakaniko on·e indakgipa cholko on·anina skotong minister Pa Conrad Sangma-chi re·dilenggipa MDA 2.0 sorkariko ua dingtangmancha de·mittele aganangaha.

Koborrangoniko knasoengani gitade, warachakgipa doloni ia post-na darangkoba candidate-na mingsoa dongjani gimin, Pa Thomas-an agan-chalaitimgipana seokaniko man·aignok ine nikna gita man·enga, jean Mongolbar salo uni nomination lekkako on·anganichi iana skang biapko ra·anggipa UDP-ni skotong dilgipa aro Mairang constituency-ni MLA Pa Metbah Lyngdoh-ni biapko ra·angskana gita tarienganiko nikatna gita man·gen.