Shillong, Sept 13: Ong·telaigipa a·sel ba obostarangchi su·peka man·e nok-jamrang nosto ong·anirangna gong·rakbate dakchakanirangko on·na man·na gita district ge·antini deputy commissioner-rang baksa mitam tangka-paisarangko dingtangmancha donna gita sorkari chanchie ra·baenga ine skotong minister Pa Conrad K Sangma Mongolbar salo aganangaha.
Iani gimin sing·anina aganchakangkuanio, mijao ong·atanggipa deputy commissioners conference ong·mitingo ia ong·telaigipa obostarangni giminba chinga chanchirimjolaha ine Pa Sangma u·iataha.
“Duko ga·akgipa nokdangrangna dakchakna dongimin gong lak 25 tangkarangna agreba, ong·telaigipa obostachi nok-jamrang nosto ong·arango sorkarini dakchakaniko sengdamnade manderang man·jawa uni gimin DC-rang baksa mitam tangka-paisarangko dingtang donna gita nangengani gimin chinga tik ka·ona sokaha,” ine Pa Sangma talataha.
“Iandakgipa obostaona dingtangmancha tangka-paisarangko DC-rang baksa donani gimin namnike ra·chakaha aro kamrangko maidakgipa bewalo ka·anggen iani gimin cholrangko am·na jotton ka·enga” ineba Pa Sangma agandapataha.
Pa Sangma-ni aganani gitade, a·sel obostarango nok-jamrang nosto ong·anina sorkarioniko dakchakaniko man·na bilsi 2-4-rangna sengnade manderangna kraa ong·jawa.
Iana skang, ong·telaigipa obostarangchi su·peka man·e Bhoirymbong block-ni ning·o ia bilsini April jao gimik ge 187 nokdangrang neng·nikaniko man·tokaha ine Revenue & Disaster Management-ni minister Pa Kyrmen Shylla u·iatangaha.
Obosta ong·anichi gimaa gimikara gong lak 13.94 rangona ong·a jeonikon gong lak 8.79 tangkarangkosan on·engpiti aro neng·nikenggipa nokdangrangna gamna nangdapenggipa da·o gong lak 5.15 mangni gitade dongengkua, ine ua talataha.
Iani gimin, bangki tangka-paisarangko basako on·gen ine Umroi-ni MLA Pa George B Lyngdoh-ni aganchakaniko am·anina, ia gong lak 5.15 tangkarangko sokatna gita chinga changgipin tom·taianiko sengengkua ine Pa Shyllai aganchakangaha.
Iani gisepon, Mawsynram-ni MLA Pa Himalaya Shangpliang, neng·nikaniko man·gipa nokdangrangna tangka-paisarangko sokatna gita ja·manchakatanina suk ong·gijaniko parakangenba, sak 200 na baten manderangni bimingrangko Mawsynram-ni BDO, disaster management-na pakwatataha indiba tangkarangko da·onaba man·soa dongkuja ine parakataha.
Iana aganchakanganio, East Khasi Hills district mangmangnan gong kror 1.36 tangkarangko on·aha aro da·ona, ong·telaigipa obostachi neng·nikaniko man·gipa nokdangrangna dakchakaniko on·na gita a·jatangtangni DC-rangna gong kror 50.20 tangka-paisarangko on·atmanaha ine Pa Shylla u·iataha.
