Shillong, Sep 13: Ri Bhoi a•jani Myrdon Mawtari jolo donggipa dingtang dingtang songrango fiber wire-rangko sringna gita a•kolrangko cho•e songni nokni manderangna neng•nikanirangko on•engani gimin Jio company-ni kosako nanga gita ja•kurangko de•china Confederation of Ri Bhoi People (CORP) Central Zone, Ri Bhoi a•jani district administration-ko didiangaha.
CORP central zone-ni president Shiningstar Kyntla-ni parakatani gitade, Jio company-ni manderang, Myrdon Mawtari jolo donggipa dingtang dingtang songni ramarango fiber wire-rangko sringna gita a•kolrangko cho•ani a•sel manderang re•a doanirango neng•nikanirangko chagrongna nangtokengani gimin re•anggipa jaon ia ramarangko taripile on•china Jio company-ni kosako badi ka•doangahachim indiba iani bidingo maming aganchakanirangko man•kujaengachim.
Iani bidingo Ri Bhoi a•jani Deputy Commissioner-ko gronge agangrikna jotton ka•on, uamangko grongna jechake, Ri Bhoi a•jani Additional Deputy Commissioner-ko grongskachina aganahani giminba CORP-ni dilgiparang, Deputy Commissioner-ni kamna suk ong•gijaniko parakataha.
