Tura, Apr 29: Sukrobar salo, Meghalaya a•dokni Chief Minister Conrad K Sangma, West Garo Hills a•jani Rongram Block-ni ning•o donggipa Oragitok songo ‘Ginger Mission’-ko a•bachengate on•angaha aro ia mission-ko a•bachengate on•anganio North Tura-ni MLA Thomas A Sangma baksana gipin dilgiparangba dongpae bak ra•angaha.
Meghalaya a•doko e•ching ge•aniko bariatna aro dingtang dingtang rokomni e•chingrangko ge•na miksonganio a•dok sorkari, ia ‘Ginger Mission’-ko a•bachengatahachim. Ia program-ko a•bachengatanichi a•doko sak 40,000-mangni gita game ge•e cha•giparang namgnirangko man•na siengachim.
Ia Ginger Mission-ko a•bachengate on•angani somoio a•dokni Chief Minister, jolo game ge•e cha•gipa manderang baksa agangrikengon, ia program-ko ra•gatna gita gong kror 121-ko bilsi gittamna chamaha aro ian processing unit-rangko kulina, training-rangko on•na aro gipin kamrangnaba ong•gen ine parakataha.
Ia mission ba kamni mongsonggipa miksonganiara da•o mikkang bilsi gittamni gisepon bilsio metric ton 60 e•ching man•aniko bilsiprako metric ton 150-ona bariatna aro India a•songo Meghalaya a•dokko e•ching man•batsranggipa a•dok ong•atna miksonganian ong•enga ineba Chief Minister parakataha.
Game ge•e cha•enggipa manderangni namgnina Meghalaya sorkari, piggery mission, jackfruit mission, poultry mission, goatry mission, SHG-rangko ra•doani aro game ge•e cha•giparangni dal•batsranggipa FOCUS program-ko a•bachengataha ineba Chief Minister parakataha.
Batanggimin bilsibrini gisepo a•dok sorkari, game ge•e cha•giparangni dingtang dingtang program-rangchi gong kror 1000-na baten chimongna man•aha ine talataniko on•angengon, tangka paisarangko aro scheme-ko nambate jakkalna man•na gita ia Ginger Mission-ni bidingo songni manderangna name talate on•china aro dingtang dingtang cooperative society, SHG aro producer group-rangko bikote ia program-ni namgnirangko ra•china Chief Minister didiangaha.
Meghalaya a•doko lak 4.5-mangni gita game ge•e cha•giparang dongani gimin sorkario kam ka•giparangchide ia program-ni gimin talate on•na man•sokjawa ine janapatengon, cooperative aro multi purpose society-rangko bikote ia kamko chu•sokatchina Sangma didiangaha.
Ia program-ko ong•atanio ua dol 40 producer group-rangna gong lak 27.60-ni cheque-rangkoba suale on•angjolaha aro Apiculture Mission 2.0-ni ning•o dingtangmancha bija jilani baksorangkoba suale on•angaha.
Da•o dipet Rongram block-o 1876 nokdangrangko man•gope dol 287 producer group-rangna gimik gong kror 1.8 tangkarangko suale on•na man•aha.
