Seatgipa Mike Sangma
Anga an·tangde P. A. Sangma sagi-ko name ma·sirikja. Indiba uni gimin jeko anga ma·sia, uan angni Delhio donge journalist-ni kamko ka·na a·bachengani somoio name gisik ra·beani ong·aha.
1995 bilsio Sangma-ni Information and Broadcasting Minister ong·ani somoio, angni Delhi-ni ANI-o cub reporter-ni kamko ka·engmitingo, All India Radio-o ru·uta bilsirangna news reader aro voice trainer-ni kamko ka·enggipa Barun Haldar angna uni gimin mingsa kattako aganaha. Angaba Sangma chatchi-nin ong·a ine ua nikaha. Pilakan uko ‘Borunda’ ine okamachim aro angni nikaniode ugita namgipa Bengali mandeko anga chagrongkuja. Anga an·tangan Bengali me·chikko bia ka·ahani gimin anga iako namen u·ia. Borunda-ni ku·rang namen sranga aro knatoa, aro da·ororo uni ku·rang gita dakgipako knarongja.
Sangma jensalo office-o kamrangko ka·na a·bachengon, All India Radio aro DD news-ko poraitimgiparang uni chatchi-ko gam·atna neng·niktokachim. Bang·aan Sangma-ko ‘SANGAMA’ ine gam·atachim. A·bachengode Sangma ia gam·atsretaniko chakchikaha indiba adita antirangna indake ong·on, ua I&B official saksa, Bhaumik minggipa Bengali mandeko okame, ‘Bhaumik, na·a angko ‘SANGAMA’ ine okamaniko dontongjaode, anga Parliament-o ‘HANGAMA’ (golmal) ong·atgen,” ine ua aganaha.
Uandake office-ni manderang an·tangtangni dilgipani bimung ong·e gam·atna skina inenba gitik-gitak tom·aniko ong·ataha. Da·alona kingkingba, bang·aan uko uni Lok Sabha-ni Speaker ong·mitingo Parliament-ni Memberrangni ong·atgipa ‘hungama’-ko namatanina gisik ra·tokkuenga. Ua Parliamentary session-rangan uko Salgro-Salaram-ni Politics-ni dingtangmchagipa dilgipa ine niksengataniko on·aha.
2001 bilsio, Indian Institute of Mass Communication-o angni poraia matchoton, anga NDTV-o kam ka·na sandiaha. Anga uko gronge agangrike dakchakatna man·genma ine sing·aha. Ua angni CV-ko uni office-o uni Personal Assistant Rehman-o on·e donchina aganaha. Anga uko dakaha aro uni gimin gualpilaha, Ua salrango, man·e cha·giparangsan mobile jakkalna man·aiachim aro ango mobile phone dongjani gimin uni office angna kobor on·atna sikgenchimoba chol dongjaha. Ua somoio anga Mumbai-ona re·angaha aro Times Now baksa kam ka·na a·bachengaha.
Bilsi gnini ja·mano, anga Delhi-ona re·bapilaha. Angni janapgipa NDTV-ni kamna ua mande sandienga ine anga koborko man·aha. Ua indakpilgipa namgipa mande ong·achim, ua mamung saloba gualjachim aro je mandenaba an·tangni bilsi nalsachiba re·ange dakchakna gong·aiachim.
Chinga Catholic-rangde godfather ingipa katta donga. Ian songsar-o mande ra·ako man·gipa ong·a jean napolani misaboli-ko dakdilgipa ong·a. Ia mandean ma·a-paarangko uamangni dedrangko Catholic torom-o dal·atna dakchakgipa ong·a. Uan Mario Puzo-ni Godfather-o janapgipa ong·a, jekon Franciz Ford Coppola 1972 bilsio Hollyood-o The Godfather ine ja·wilwat-ko tariaha. Don Corleone, jean golpoo segimin Sicily-ni Mafia-ko dilgipa ong·a aro uan uni chel·chakgipa manderangko dakchakna jedakgipa cholkoba ra·e dakchakronga. Na·a Mafia-rangni ja·wilwatrangko nina namnikgenchimode, Marlon Brando-ni Don Corleone-o pangchakean Hollywood-ni pilak Mafia ja·wilwatrangko taria ine nikna man·gen.
P.A Sangma-an Delhi-o donggipa A·chikrangnisan ong·aija indiba Salgro-Salaram a·dokrangni bang·a manderangnan Godfather ong·a aro uamang pilakan uko uamangni pal ku·rang on·gipa ine nichaka. Ua bang·a manderangni janggi tanganirangko namdapataha. Ua politics-ni bidingo jedakgipa rai-ko ra·genchimoba, manderang pangnan unbaksa ong·achim. Krismas ba Easter aro uandakgipa tom·bimonganirangko ong·aton, ua an·tangni dongckahipa 30 Aurangzeb Road-o sokachakna on·ronga. Ua pangnan ka·dingsmite, manderangko ka·dingate aro uni chagronggipa pilak mande baksa agangrikronga. Gipin politician-rang git aua napchipe dongna man·genchim indiba ua indakgipa ong·jachim.
Ua namen bimchipgipa mande ong·achim. Ugita dake namgipa aro kam ka·gipa India-ni politician-ko anga saksakona nikkuja. Namen susana nanggipa Meghalaya-ni politics-o an·tangko taria baksana, a·brini jatrangni pal ong·e Delhi-o Congress-o kam ka·anichi, uni politics-o songgigrikani namen gisik ra·na kragipa ong·a. Uan pilakna ramako mesokdilgipa ong·a. Darang A·chik-ni re·na pa·sokgijagipa rama-ko ua re·e mesokaha, aro bang·gija manderangsan uni ramako re·na pa·aigen.
Ua namen mingsinggipa I&B Minister ong·achim aro una bateba mingsinggipa Lok Sabha-ni Speaker ong·achim. Uni janggi tangani bang·bata salrangon ua tik somoion kamrangko man·aha. Live television-ko dakna a·bachengani somoio ua speaker ong·aha aro uandake a·songni pilak manderangko uko namnikaha.
Ru·uta bilsirangna journalist-ni kamko ka·enggipa, Salgro-Salaram a·doko ma·chong donggipa Shekhar Gupta baksa agangrikon, Sangma-ni niksenganiko man·aniara namen ta·rakaha aro among jajagijaan ua a·brini jatrangni palo kam ka·gipa ine Delhi-o pilakan uko ra·chakaha.
Bang·a manderangan PA Sangma-ni Sonia Gandhi-ni citizenship-ni bidingo Congress-ni kosako chakataniko ong·gija ja·kuko de·ani ine agannaba gnang. Indiba bang·a a·brini manderang, aro mongsongbate Catholic nokdangrangko name dal·atako man·giparang uni kamko ma·sichakgen. An·ching ong·a aro ong·gijako dingtangatna changa aro mande ong·e jedakgipa bite-ko chagronggenchimoba an·ching ong·akosa dakna nanga. Ua somoio an·tangni ong·nikanio ga·chate chadenganina anga namen rasong chaa maina bang·a manderangan aro mongsongbate politician-rang kakketna chadengna kena. Kiren Rijiju, Himanta Sarma, Pema Khandu ba Conrad Sangma-koba da·alo Modi ba Amit Sha-ni kosako sorkarini sasonko jegalaniko chanchiate nibo. An·chingni P.A. Sangma-de iandakgipa kamna chadengna pa·gipasa. Ia obosta-an uni politics-o kam ka·anio dingtanganiko ra·bagipa ong·aha aro NCP aro NPP-ni atchiani pangchakani ro·ong ong·aha.
President-ni kamna uni chakaton, uni mikkango mai dongsoachim ua namen u·iachim. Pranab Mukherjee sagi-kon pilakan namniktokaha indiba Sangma chakataniko dontongjaha. A·songo chubatgipa gadangni kamna a·brini katrangoni saobade krenge mesokdilna nanggen ine ua u·iachim. Ian uni ning·tue chanchianichi dakgipa ong·a aro politics-o mingsing-minggamanina ong·ja ine anga da·alo bebera·a. Da·oni chasongo politics-o an·tangna dal·batgiparangni nangnika gita bame on·ani aro tangka-paisako man·ani chol dake ra·genchimoba, Sangma-de chasong gitchamni cholon bewalrangko ja·rike janggi tanggipa ong·achim.
Unbaksa name meligipade uni namgijanirangko niknaba donga. Uni ka·onangako chagronggipa adita sak manderangkoba anga u·ia. Iako chagronggipa manderangna, Latin-o indake aganani gnang, ‘De mortuis bonum dicendum est’, jeni orto-an “Sigiminrangni gimin, namana agre mamungkoba aganna nangja. Iani bidingo anga iakosan aganaigen.
Da·alo right wing, biapni kri mandeko baseani, a·brini jatrangko mikkang niani aro manderangko bakgipa politics-ni chasongo, Meghalaya aro mongsongbate A·chikrangni gisepo iandakgipa nangai-nangjai kajiarangni kosako chadenge a·dokna kakket kam ka·gipako nangenga. Da·o manderangni ku·rang bang·bea, donmitapgipa miksonganirang, NGO-rang aro party-ni manderang donga; NPP aro Congress-ni kajia, BJP-ni kajia-golmal, Trinamool-o petrol bomb ba Molotov cocktail-ko a·brini jatni manderangni politics-o bak nangatenga. Ia pilak dolrang damsan asonge biaptango ong·enggipa obosta jekai GHADC-ni neng·nikani aro nima rongdikni 6-gipa schedule-ni ning·o mai ong·gen, iarangni gimin agangrikanirangko dakna nangachim. Indake dakjagenchimode, an·ching an·chingni a·brini jatrangni obostarango sakgipinrangko jak sikbrokna okamatenga ga·akgen.
Anga bebera·a P. A. Sangma gita kam ka·na Conrad-namangba dal·a katta ong·a. Chasongsani chasonggipinona nokdang ge·sanni politics-o kam ka·ani bidingo aganani gnang. “Skanggipa chasong rika, gnigipa uano an·sengchaka aro gittamgipa uko nisia.” Conrad, James aro Agatha-na indake ong·jawa ine anga ka·donga. Uamangni pagipani nama kamrangko uamang ka·anggen ine anga angni skani aro bi·aniko on·a. Sangma uni politics-ko rikna bang·a manderangni ku·pattiani, togiani aro Section 8 company-rangko nangja. Pilakna skangba ua manderangna dangdike on·gipa ong·achim, aro anggita ramram mandenaba reporterni kamko man·e on·na dakchakgipa ong·achim. Ua pilaknin Godfather ong·achim.
Uni janggi tangani dal·batgipa skianiara Delhio uni bon·kamgipa salrang ong·gen. 2016 bilsi March-ni a·bachengao, noktango walni somoio uni saksan sianganiko knae chinga pilakan namen duk ong·aga. Uni nokdangni manderang Tura-oni re·bamitingo uni nokona skanggipa sokgiparangoni angaba saksa ong·paa. Uni janggi tanganiara skianian gapgipa ong·a aro uarangoni bilakbatgipara, “Mamungba gamchatbatja,” “An·ching pilakan saksan re·baa aro saksan sianga”. An·chingni bimung, mingsing-minggamani, aro gam-jin maming gamchatani gri aro manderangna nang·ni dangdike on·anian gamchatbata. Ian P. A. Sangma-ni dal·batgipa donangani ong·a.
Na·simang iakoba nina man·gen:
Na·simang iakoba poraina man·gen: Associated Board of the Royal Schools of Music (ABRSM), Tura-o skanggipa changna music examination-ko a·bachengata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
Download our app from playstore – Northeast Media Hub
