Jowai, Nov 11: Re·anggipa November 8 tarik, Sombar salo a·songni skotong New Delhi, Rashtrapati Bhawan-o tom·aniko ong·atanggipao gama-ge·aniko dakanio Padma Shri upadiko President Pa Ramnath Kovind-ni jakoniko ra·chakanggipa saksa gamgipa aro skulo skigipa Ma Trinity Saioo-ni mija Butbar attamo uni songtang Mulieh-ona sokbamano songni manderangko uko mande ra·bee dal·e rimchaksotokaha. Ua salara Mulieh songni manderangna re·bagnigipa chasongrangona kingking namen gisik ra·na krabegipa somoiba ong·jolaha.
Laskein C&RD Block-ni wilwilao donggipa sak 800 gamgipa-ge·giparangko ku·mongrimenba a·gilsak gimiko da·o namen mingsingenggipa aro holdirangni gisepo gun dongbatgipa Lakadong Turmeric ba holdiko ge·na gita Self Help Group-rangko songna ja·ku de·e kamko ka·chakatani gimin Ma Trinity Saioo-na a·songni chubatgipa gadango mande ra·pilskaaniko dake ua upadiko ong·angaha.
Ua songni gita uko dingtangmancha mande ra·pilskaaniko Mulieh-ni Dorbar Chnong ba Nokmachi Madan Skur Wah Chnong-o dakdilangaha jeon Raliang-ni MLA Pa Comingone Ymbon, ua somoio gipin sokbapagipa Laskein C&RD Block-ni BDO Dr. Brightstar Langbang, Lakadong Mission-ni Project Officer, Pa Demanson Lyngdoh aro gipinrangni dongpaanio mongsonggipa sokgipa ong·e tom·ao bakko ra·angaha.
Laskein C&RD Block-ni BDO Dr. Brightstar Langbang-ni ua somoio jinmana aganangengon, ia salara Mulieh songni manderangna ba Laskein C&RD Block-nasan namen rasong chabeani ong·aija indiba Jaintia Hills aro Meghalaya a·dok gimiknan kusini somoio ong·chongmota aro pilak kamrango bimchipani aro krengani dongna nanganiko Ma Trinity Saioo, sakgipinrangnaba dididianiko on·aha ine parakataha.
Ua somoio, jinmao chadenge agananganio janggi tangna skulo skie on·ani kamko ka·enggipa Trinity Saioo, uni skul ka·enggipa St. Margret RCLP School Mulieh-ni nokko taridapna nanggitikengani gimino skulna dakchakanirangko on·china gita joltangni MLA-ko mol·molanga baksana, Mulieh songo ge·enggipa Lakadong holdini rokomko mikkangchina name ripinge rakkiangkuchina gita songoni game-ge·e cha·giparangkoba mol·molangaha.
Apsandake, ia chu·sokaniona ramako mesokdile on·gipa aro uni kamo unbaksa pangnan ong·bagipa sakantikon, mongsongbate Meghalaya Farmers Empowerment Commission-ni Chairman Pa KN Kumar aro Meghalaya-ko skotong minister Pa Conrad Sangma-maangko a·dokni game-ge·e cha·giparangna aro una dakchakaniko on·ahaninaba dingtangmancha mittelpilangaha.
Unomiting, Raliang-ni MLA Pa Comingone Ymbon, jinmana agananganio ‘Ia salara chasongrangona kingking Jaintia Hills a·jao songdongenggipa manderangni gisiko dongkamnasigipa somoi ong·chongmota’ ine aganenba, Lakadong holdi-ko ge·anio uni dakdilanichi ua joloni manderang bang·en namgniko man·tokahani gimin mikkangchiba apsandaken dangdike on·angkuchina gita Ma Trinity-ko mol·molangaha.
Unbaksana, saksa mande ton 20 Lakadong holdirangko am·ode nokdang ge·prako bi·a gita holdirangko ong·katatna amsokjawa, uni gimin krimkro kamko ka·anichi nanga gita on·atna man·gen aro ua songoniko man·gipa holdini damrangko on·tisa dingtanggrikate komiatnaba man·gen ine toe aganangenba, lap man·gnina aro pilakni namgnina songni manderangko ku·cholsan kamko ka·tokchinaba ua songni manderangko didiangjolaha.
Tom·ao aganangpagipa gipinrangara, Hills Farmers Union-ni General Secretary A. Kharsyntiew, Lakadong Mission-ni Project Officer Demanson Lyngdoh aro gipinrang ong·a.
Uko rimchaksoaniko dakani somoio, songni Dorbar Chnong, St. Margret RCLP School-ni skigiparang, SHG-rang aro Manbha VO-chi Ma Trinity-ko dingtangmancha mande ra·pilskaaniko dakangaha.
