Shillong, March 21: Champengatgimin pekgipa ringanirangko niam gri badingsrukengani kosako a·dokni police-rang raka ja·kurangko de·ate kamrangko ka·genchimoba aro salantin gita ong·pile pekgipa bosturangko aro badinggiparangko rim·genchimoba, Meghalaya a·dokni skotong songjinma Shillong-o iandakgipa ong·gija kamrang batsa-batrikrikenganiko nikna gita man·enga. Uandake, mija Sombar saloba niam gri pekatgipa samrangko badinggipa me·chik saksa Anju Khatoon minggipako songjinmani Lower Paltan Bazar Cantonment joloniko adita bang·bea bosturang baksa police-rang rim·taiaha ine koborko on·ataha.

Rim·ako man·gipa me·chikara Assam, Dhubri-oni ong·a aro uko da·o police station-china rimange adita sing·sandianirangko dakatenga ine koborna parakataha.

Indake nikatna man·gen, chong·motan, Shillong, Jhalupara-ni Paltan Bazar, Lower Paltan Bazar cantonment-o donggiparang bang·batan bipinchini re·bae dongnapegiparangsa ong·tokani gimin aro bang·aan niam gri dongenggiparang ong·an baksana, pekgipa ringanirangko jakkalgiparang ong·ani gimin bosturangko skatang niam gri badingchakna gita manderang ua biapko jakkalenga.

Iandaka ong·gija kamrangko ka·anio rim·ako man·giminrangba a·doko niamrang chu·onga gita dongjani a·selo altuen ong·katangpilna gita cholko man·rongenga aro apsan kamkon uamang ka·piltokaenga ineba nikatna gita man·gen.