Shillong, March 21: Meghalaya a·dokni sima jolrango songdongenggipa manderangna naljokaniko on·na gita a·dok sorkari, gital police station aro police outpost-rangko kulidape on·aha ine Mongolbar salo, a·dokni Chief Minister Conrad K Sangma, Assembly-o parakataha.
Budget session-ko ong·atanio Nongkrem MLA Ardent Miller Basaiawmoit-ni sing·anina aganchakaniko on·angengon, Assam a·dok baksa nangchapgipa simarango a·dok sorkari, damsni gital border outpost-rangko kulidapaha ine Chief Minister parakataha.
Assam aro Meghalaya a·dokni simarango skang dongsoenggipa police station aro outpost-rangna agreba a·dok sorkari, gital police station aro police outpost-rangko kulidapaha ine Sangma parakataha.
A·dok damgnini gisepo meligrikna man·jaenggipa biaprango deputy commissioner-rang, Assam-ni deputy commissioner-rang baksa agangrikjringenga ineba Chief Minister parakataha.
Chief Minister-ni parakatani gitade, so·sojengjeng ong·enggipa sima jolrango tom·tomaniko rakkina gita Superintendent of Police (SP)-rangna dingtangmancha Standard Operating Procedure (SOP) ba niamrangko sorkari on·atmanaha.
A·dok damgnini gisepo bangki dongkuenggipa damdok biaprango tom·tomaniko ra·bapilna gita Cabinet minister-rangni dilanichi regional committee-rangko songmanaha ineba Sangma parakataha.
Indake ong·engon, gipin a·songrang baksa nangchapgipa international border-rango gimik dam 14 police station-rang donga aro Indo-Bangla simarangoba police outpost-rang baksana infiltration check post-rang donga aro ia jolrango police-rang salantian ja·arangchi re·rurae nirok sandianirangko dakjringenga ineba Chief Minister parakataha.
