Shillong, Nov1: Sonibar salo Union DoNER Minister Jyotiraditya Scindia aro Meghalaya-ni Skotong Minister Conrad K Sangma Integrated Development of Sohra Tourism Circuit-na Tourism Minister Timothy D Shira, Sports Minister Wailadmiki Shylla aro Arts and Culture Minister Sanbor Shullai-ni mikkango pangchakani ro·ongko songe on·angaha. Ia tom·anio Shella-ni MLA Balajied Kupar Synrem, Sohra-ni MLA Gavin M. Mylliem, Chief Secretary Dr. Shakil Ahammed, aro gipin agipi dilgiparangba re·bae bak ra·angaha.

Ia kror ₹ 300-na batani project-ara Meghalaya-ni nitobatsranggipa biaprangoni damsao tourism-na daka-rikanirangko namdapatna aro rona re·bagipa manderangna nambata cholrangko on·na ine miksonganio ra·bagimin ong·a.

Ia project-na Salgro Salaram a·dokrango namroro-silroroaniko ra·bagipa aro pangkamgipa janggi tangani cholrangko on·gipa  PM-DevINE Scheme-ni ning·ao Ministry of Development of North Eastern Region (MDoNER), India Sorkari, tangka-paisarangko on·e dakchakenga.

Tom·ani a·bachengo Chief Secretary Dr. Shakil Ahammed rimchaksoani kattarangko aganangaha. Una agreba ua tourism-o Meghalaya-ni namroroani gimin janape, bilsianti lak 16-na baten manderang a·dokona re·baengani gimin, dingtang dingtang biaprangko tarina, manderangko ru·utbate dongatna aro rongtalgipa aro gisik gnanggipa tourism-ko dakna nanga inenba, a·doko rongtalbatgipa songrang aro chibimarang donga, aro uandaken rongtalbatgipa biap ong·naba krengna nanga ine ua talatangaha.

Ia Integrated Development of Sohra Toursim-ko ra·baaniara India-ni Salgro Salaram-ko India-ni namroro-silroroanio mongsonggipa krong ong·atna Prime Minister Narendra Modi-ni niksamsoe kam ka·aniko mesoka ine Union Minister Jyotiraditya M. Scindia parakatangaha.

A·songni pilak noksikrangona namroro-silroroaniko sokatna ine PM-DevINE scheme-ko a·bachengataha aro Sohra-ona ra·bagipa project-rangara daka-rikanirangsan ong·aija indiba ua jolo songdonggipa manderangni janggi tangani gadangrangko namdapatna aro cholrangko on·na ineba ong·a ine ua janapangaha.

Uandake Prime Minister Modi-ni dilanichi, Salgro Salaram a·dokrangna 2014 bilsio kror 36,000 tangkarangko tikataoni da·o kror 1,00,000 tangkarangnaba bataha aro kror 50,000-na baten tangkarangko songrango rama-jal·angrangko tarina jakkalaha ine Union Minister aganangaha.

Ia chamgimin tangkarangchi Sohra aro Meghalaya a·dok bang·a namgnirangko man·gen, jekai rama-jal·angrang aro sildorengrangko chalaiani project-rang, aro kror 22,680 tangkarangni Shillong-Silchar Greenfielf Expressway jean Sohra-ni sepang gita re·anggen, uandake rama-jal·angrang aro tourism-ara Salgro Salaram-o namroro-silroroaniko ra·bagipa minggni cholrang ong·a ine ua aganangaha.

Sohra-o a·bachengatgipa project-rang jekai Nohkalikai Falls, Mawsmai Eco Park, Arwah aro Mawsmai cave-ni samtangtang, Nohsngithiang Falls, Wah Kaba Falls, Shella chibima jol, aro Wah Kaliar Canyon viewpoint-ko janape, Salgro Salaram gimiko pangkamgipa aro songdonggipa manderangni dilanichi tourism-ko chalaienggipa biap ine Sohra-ko mesokna, ia project-rangko PM-DevINE Scheme-ni a·bachengatenga ineba ua janapaha.

“A·gilsakni darang biapon Meghalaya-o gita ong·telaigipa samtangtang, manderangni janggi tangani bewalrang, aro songdonggipa manderangni gisepo nangrimaniko nikna man·ja. Ia nangrimanian uni dal·roroani pangchakani ong·a,” ine Union Minister Meghalaya-ni nitoani aro tourism-ko chalaiani bewalko mitele aganangaha.

Uandake, India sorkari-ni kam ka·na kang·kare kae ra·aniara tourism-san ong·aija indiba rama-jal·angrang aro daka-rikaniarangko namdapatna ineba ong·a ine ua talatangaha.

“Namroro-silroroani ja·dilrangko chinga bilakatenga. An·chingni rama-jal·angrang namon, airport-rang manderangko re·rurana dakchakon, aro tourism namgipa gadango ong·on – silroro-namroroaniara pilak nokdangrangonan sokaha ine an·ching u·ina man·gen,” ine ua aganangaha.

Uandake ua a·dokni Skotong Minister Conrad K. Sangma-ni dilanichi Meghalaya Sorkarini kam ka·anirangko mitele, uamangni kam ka·anirangko pilakon nikna man·enga aro a·dokara mikkangchina tarisamsoenga ine ua aganangaha.

Ia Sohra Tourism Circuit-an silroro-namroroani aro samtangtangko ripinganina ja·ku de·ani nangrimaniko mesokgipa ong·a ine talatenba, Meghalaya-ni nitoaniara aiao inmangipa ong·a, an·ching uko ripingna nanga aro tourism ia nitoaniko bilakatna nanga aro nisiatna nangja ine Scindia aganangaha. Bon·kame ua ma·mong sorkarioni Meghalaya aro Salgro Salaram a·dokrangona dakchakaniko mikkangchiba on·anggen ine janapangaha.

A·dokni skotong minister Conrad K. Sangma, Salgro Salaram aro mongsongbate Meghalaya-ni namroro-silroroanina dakchakanina Prime Minister Narendra Modi aro Union Minister Jyotiraditya Scindia-ko mitelaha aro ia salko Sohra-ni aro a·dokni manderangna namen gisik ra·na kragipa ong·a ine aganangaha.

Uandake, bang·a minister-rangan Salgro Salaram-ona re·baa indiba Scindia manderang baksa melia, uamangni neng·nikanirangko ma·sichaka aro cholrangko sandina kam ka·a ine uni dingtangmancha gisik nanganina uko rasong on·e aganangaha.

Sohra Tourism Circuit-ara PM-DevINE-ni ning·o dal·begipa project ong·a inenba, iako ra·baaniara Scindia-ni namani aro ka·saanichisa chu·sokna man·a ineba ua aganangaha.

Ia project-ara Sohra-na aro a·dokni tourism sector-na dingtanganiko ra·bagen maina iani ning·o daka-rikanirangko namdapatgen, manderangna janggi tangani cholrangko on·gen aro pangkamgipa tourism-ko dakgipa biap ine Meghalaya-ko ra·dogen ine skotong minister talatangaha.

“Meghalaya-ona re·bagipa tourist-rang bilsiantian barienga, indiba da·o chingni miksonganide, daka-rikanirango, gari-gorarango aro uandakgipa uamangna nambata cholrangko on·anian ong·a jedakode uamang ru·itbate donganggen aro an·chingni manderang baksa bang·bata somoirangko re·atna sikgen,” ine ua aganangaha.

Una agreba, ua tourism-na daka-rikanirangko mikkangchi namdapatna miksonganirangkoba janapaha, jekai airport-ko rikani aro Shillong, Sohra, aro gipin mongsonggipa biaprango helicopter-rangko watanirang. Iarang pilakan Meghalaya-ni tourism-ko namdapatgen ine, a·dok sorkari Sohra Tourism Circuit-ko chu·soke aro somoi gita matchotatna kam ka·gen ineba ua aganangaha.

Uandake Tourism Minister Timothy D. Shira, Sohra-ko ong·telaigipa biaprang, janggi tangani biaprang aro dingtang dingtang gitalgipa cholrangchi nangrimgatgimin a·gilsakni namgipa gadango ong·gipa biap ong·atna niksamsoaniko aganangaha.

Private sector-ni bak ra·ani baksa ia kamrangko ka·aniara manderangni janggi tangani cholrangko on·enga, chadamberangko bil gnangatenga aro songni-nokni janggi tangani gadangrangko namdapatenga ine ua aganangaha.

Ia tom·bimongako Kutmadan, Sohra-o ong·atangaha, aro namgipa, pangkamgipa bewalo namroro-silroroaniko ra·baanichi mongonggipa ja·kuko de·e Meghalaya-ni tourism sector-ni re·mikkanganiko mesoka.

Na·simang iakoba nina man·gen: 

Na·simang iakoba poraina man·gen: Zubeen sagini ja·wilwat-ko  nina galchipgimin theatre-rango manderang gaptaia

na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/ne_media_hub