Shillong, Jun 4: Assam aro Meghalaya a•dokni simarango ong•enggipa obostarangko namatna a•dok sorkarirangni agangrikani chu•sokjagenchimode ma•mong sorkari jako ra•gen aro Khasi ku•sikko Constitution-ni Eighth Schedule-o napatani bidingo chanchina gita bakan Supreme Court-ni gitcham judge-rangchi committee-ko songgen ine Bristibar salo, Union Home Minister Amit Shah, Khasi Students Union (KSU)-ni dilgiparangna ku•rachakaniko on•angaha.
Bristibar salo, NEC-ni chang 73-gipa Plenary tom•anio bak ra•na Shillong-ona re•baanio Union Home Minister, KSU-ni dilgiparangko gronge, ia ku•rachakaniko on•angaha.
Union Minister-ko grongani ja•man kobor ra•timgipa manderang baksa agangrikengon, ia tom•anio KSU, minggittam kamrangni gimin Amit Shah baksa agangrikaha aro uan Meghalaya a•doko Inner Line Permit (ILP)-ko ra•gatchina dabiani, Assam aro Meghalaya a•dokni simarango meligrikgijani aro Khasi ku•sikko Eighth Schedule-o napatchina dabiani ong•a ine KSU-ni general secretary Reuben Najiar parakataha.
Najiar-ni aganani gitade, West Bengal aro Assam a•doko niam gri songdongenggipa manderangko sorkari a•rikgalahaoba, ia manderang Bangladesh-ona re•angpilgija gipin biaprangosa napsrukna jotton ka•skaenga aro da•o dipet Meghalaya a•doko, niam gri napsrukbagiparangko champengsona bilakgipa niamrang dongkujani gimin a•doko songdongenggipa Khasi, Jaintia aro Garorangko chel•chakna ILP-ko nangchongmotenga ine uamang, Union Home Minister-na janapataha.
Assam aro Meghalaya a•dokni simarango, mongsongbate Lapangap aro gipin biaprango, Assam-ni manderang, Meghalaya-ni manderangko sinjetna jotton ka•anirang batroroengani giminba uamang, Union Minister-na janapaha ine KSU-ni general secretary parakataha.
Simarango ong•enggipa golmalrangko namatna dolgni sorkarirangni agangrikanirang chu•sokjaenga ong•ode ia kamo ma•mong sorkari jak on•pagen ine Amit Shah, KSU-ni dilgiparangna ku•rachakaniko on•angskaaha.
Khasi ku•sikko Eighth Schedule-o napatchina dabianikoba ma•mong sorkari nienga aro bakan iani bidingo Supreme Court-ni gitcham judge-rangchi committee-ko songna gita Union Minister ku•rachakaniko on•angaha ineba Najiar aganaha.
Union Home Minister baksa agangrikanirang chu•sokgipa ong•ahama ine sing•anina aganchakaniko on•angengon, uamangni kamde a•dokni neng•nikanirangko mesoke on•anisan ong•aia aro kamrangko chu•sokatanide a•dok aro ma•mong sorkarirangni daitosa ong•a ine Najiar aganaha.
Na·simang iakoba nina man·gen:
Na·simang iakoba poraina man·gen: Union Home Minister-ni re•baanio gari gorarangni re•ruraaniko champengatanina manderang ding•chaoa
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
