Guwahati, April 28: Sikkim a•dokni bilsi 50 gapaniko maniao Prime Minister Narendra Modini bakra•aniara silroro-namroaniko ra•baan baksa manderangko dingtang bewalo grongani ong•a – chamdamberang baksa pringo robol kal•e roani, tourism-ko ra•doani, nambata songre-songgabatani aro ong•telaianiko ge•e-game cha•anikoba ua ra•bachapaha.
Uni gronganiko. Modi Gangtok-o chadambe robol kal•giparang baksa kal•pae a•bachengaha. Nambegipa pringni bako Sikkim-ni chadambe ripengrang baksa Gangtok-o robol kal•aniara “katchabeani” ine ua janapaha.
Ja•mano ua Orchidarium-ko nieaha aro uko Sikkim-ni ong•telaianiko an•sengatgipa ine janapaha. Ong•telaianiko indakachi ripinganiara wilwilao donggipa ong•telaigipa janggirang baksa India a•songni ning•tue nangrimgrikaniko mesoka aro samtangtango pangchake janggi tanganiko ra•baa ine Prime Minister aganaha.
Sikkim-an India-ni “green model”
Paljor kal•chakramo mongsong tom•anio, Sikkim-an a•gilsakni ong•telaianiko rakkigipa aro uno songdonggipa manderanga samtangtango donggipa ong•telaianiko baltigiparang ine Modi janapaha.
A•doko samtangtangni rongtal-an•talani, ong•telaianio pangchake chu•soke ge•e-game cha•ani aro samtangtango wilwile donggipa ong•telaigipa biapni diltuaniko ua aganaha – a•dokni dal•ani a•songni a•ana 1% na baten komioba, uan India-ni pul-bolgrimni 25% ni dongchakram ong•a.
Dakbewal baksa brine silro-namrorogipa ine Sikkim-ko aganengon, “Act East, Act Fast” ba Salaram jolgita ta•raken dakpachina Prime Minister diditaiaha.
Dingtang dingtang dam 30 tarisoa daksogiminrangna (projects), jekai, rama-jal•ang, bijoli, an•sengbaljokani aro skia-poraiani, ba uandakgiparangko parakate Prime Minsiter oprake on•aha ba pangchakani ro•ongko songaha.
Tourism-an Sikkim a•doko janggi-tangani cholni bolgro gita mongsong ong•a ine ua aganaha. Songregiparangko ua “vocal for local” ba joltango songdonggiparangnan dakchina didiaha aro joltango man•gipa ba bikotgipa cha•anirangko bree uarangko dake cha•enggiparangko dakchakchina aganaha.
Jinmana namgni ong•atna aro manderangna janggi tangna cholko bariatna, 1000 homestay nokrangko rikna chanchisoanikoba ua parakataha.
Organic economy and local livelihoods
Ong•telaianio pangchake game-ge•e cha•anio Sikkim-an India-o skanggipa aro uan a•gilsak gimiknan nama dakmesokani ineba Modi gisikra•attaiaha. Ong•telaigipa bolam-bolterangko jedake elaichi, e•ching, kiwi aro avocado biterangko palbadinganiko apalatchina aro uarangko game-ge•e cha•gipa gamecha•giparangko nambatatna pangchakanirangko bilakdapatenga ineba ua aganaha.
Mechikrangni dilgipa Self-help group-rang, jerangan chasong gitalo pangchake songadam-nokadamo janggi tangani gadangrangko dingtangatenga, uakoba ua janapaha.
Uni re•baanira silroro-namroroaniko ra•baanian mongsongbatgipa ong•oba, ru•utaonin dabienggiparangkoba naatnaba gnang ina.
Chief Minister Prem Singh Tamang-ni aganani gitade, Prime Minister-ni re•baanio a•dok sorkarini gita mitam dabianirang jerangan engtokalja uarangkode janapjawa ina. “Uan chingona sokgipa gitasa ong•ani gimin chinga political issue-rangkode naatjawa. Chinga chu•gimik dol baksa Delhi re•anggen aro unosa chingni dabiani lekkako on•gen,” ua aganaha.
Mongsong dabianirang, jedake Limboo-Tamang jatrangna reservation, mitam jatrangna tribal status aro 17gipa Karmapa-ni golmalni bidingode agananio mamingkon janapjaha.
Na·simang iakoba nina man·gen:
Na·simang iakoba poraina man·gen: M’laya a·dok sorkari, gital Indoor Cricket Academy-ko oprake on·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
