Shillong, July 21: Meghalaya police-ni kamona rimnapgital manderangna appointment letter-rangko on·na gita Meghalaya Police Department, ianpakode batanggimin changrangoni dingtangtee skanggipa changna dal·bee tom·aniko Sukrobar salo, Shillong International Centre for Performing Arts and Culture-o ong·atangaha aro ia programona a·dokni skotong minister Pa Conrad K Sangma baksana dakchakgipa skotong minister Pa Prestone Tynsong, Director General of Police, IPS, Dr. L. R. Bishnoi, Chief Secretary, IAS, Pa D. P. Wahlang, IPS, Pa F. G. Kharshiing, aro IPS, Ma M. G. T. Sangma-maangba bakko ra·angaha.
Sak lak 1 hajal 50 kamna dorgasto galgiparangoniko sak 1010 manderangko police-ni kamo rimnapna gita Central Recruitment Board-ni rakbee kamrangko ka·ahanina a·dokni skotong minister, uamangko dingtangmancha de·mittele agananenba, police force-ni kamrangko bilakdapatna gita police-ona rimnapgital manderangni an·tangtangko chu·gimik on·kange mikkangchi kamko ka·anggnini gimin an·tangni ka·dongchakaniko parakangaha.
Ia tom·anio, dal·dalgipa manderang, officerrang aro nokdangni manderang gimikni dongpaanio, Meghalaya police-ona rimnapgital chadamberang jekai, Ibapalei Syiemllieh, Ferdinand Chyrmang, Jessica Kharbuki aro Meghna D Sangma-maangna a·dokni skotong minister, an·tangni jakchi appointment letter-rangkoba on·angjolaha.
A·dokni niam aro ge·etaranirangko namedake rakkina gita police force-ko mangrakdapatna a·dok sorkarini on·kange kamrangko ka·engani gimin aganangengon Pa Conrad K Sangma, police department-o ge 2000 post-rangna manderangko rimnapa baksana district-ni commissioner-ko kamo donataniko man·chape a·dokni niamrangko bilakdapatna gita chingni sorkari dingtang dingtang ja·kurangko de·chakataha ine parakatan baksa, chasongni kri police force-ni kamrangko namdapatna aro kam ka·aniko gong·rakdapatna gita dingtang dingtang police station aro outpost-rangona gital garirangko brebana gita tik ka·aha aro police department-o engineering wing-ko a·bachengate on·ani gimin kamrangko ka·atenga baksa bang·arangkon namdapatna gita chinga kang·kare kaenga ineba skotong minister parakataha.
Kamona rimnapgital police-rangko department-ona dingtangmancha rimchaksoengon, Director General of Police, Dr. L. R. Bishnoi, salni tom·anio dongpagipa pilakan kamna rimnapani dingtang dakgipa porikkarangko uamang chagrongani ja·man seokako man·na kragipa manderang ong·e chu·sokaniko man·aha ine aganangenba, ia bilsini recruitment-o district dam 12-rangoni me·chik candidate-rangni 22.7 percent-mang dongpaaniko janapatjole, a·dokni niamrangko mikkangchi nambate manianio police dolni namgipa gunrangko rakkina aro ra·doangna chu·gimik on·kanga gnang uamangni kamrangko ka·gnini gimin an·tangni ka·dongchakanikoba parakatjolaha.
Iakoba poraie nina man·gen: NPYF, Class X aro 12 ni topper rang aro gipinrangko Shillongo mande ra·e tom·aniko ong·atanga
WATCH:
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
