Shillong, Dec 2: Meghalaya a·doko da·o Congress dolni MLA-rang komiangahaoba, gital dilgiparangko ong·katatna kam ka·gen aro gital dilgiparangko ong·katatanio Congress, dol me·chikrangko politics-o bilakgipa ong·atna gita cholko on·gen ine Bristibar salo, Congress Legislature Party (CLP)-ni gital dilgipa Ampareen Lyngdoh parakataha.
CLP-ni gitcham dilgipa Mukul Sangma-ko man·chape a·dokni gimik sak 12 MLA-rang Congress doloni ong·kate Trinamool Congress-o napangani ja·man Congress dolo da·o sakbonga MLA-rangsan dongaiaha aro uandaken Bristibar salo ia sakbonga MLA-rang, CLP-ni gital dilgipa Ampareen Lyngdoh-ni dilanichi Shillong-o tom·aniko ong·atangaha.
Tom·a matchotani ja·mano kobor ra·timgiparangna talataniko on·angengon, Meghalaya a·doko uamang bakan gital dilgiparangko ong·katatgen aro politics-o me·chikrangko bilakatna gita uamang, chena ka·donge nikgipa me·chik candidate-rangna cholrangko on·e dakchakanirangko on·gen ine CLP-ni gital dilgipa Ampareen Lyngdoh parakataha.
Meghalaya a·doko Congress dolko bilakatpiltaina gita uamang ia tom·anio chanchirimangaha ine janapatengon, mikkangchi Congress dolna namgni ong·na gita uamang gital dilgiparangko ong·katate ia dilgiparangchian a·doko Congress dolko bilakatpiltaina rake kamko ka·gen ine Lyngdoh parakataha.
Sak 12 MLA-rangni ong·katani gimin uamang duk ong·ja indiba a·doko songdongenggipa manderangni namgninasa uamang Congress dolko bilakatpiltaina rakbate kamko ka·na gita tik ka·aha ineba Lyngdoh parakataha.
Sak 12 MLA-rangni ong·kate katani ja·man da·o Lyngdoh-an Congress dolni ja·delbatsranggipa dilgipa ong·e CLP-ni skanggipa me·chik dilgipaba ong·ahachim ine nikna man·a.
Mikkangchi Congress dolko bilakatna gita kamko ka·anio maming champenganirang dongjana gita Congress doloni ong·katgipa sak 12 MLA-rangni block-rangko bilakatna uamang kamrangko ka·anggnok aro ia sak 12 MLA-rangna chakpagipa Congress dolni membor-rangkoba doloniko ra·galaha ineba Lyngdoh parakataha.
Congress doloni ong·katgipa sakgni membor-rang, chong·motan Shitlang Pale aro Charles Pyngrope-ni kosako uamang December 10 tariko nanga gita ja·kurangko de·anggen ineba CLP-ni dilgipa parakataha.
