Shillong, Dec 2: Shillong Municipal Board-o kam ka•enggiparangna Shillong Municipal Employees Association (SMEA)-ni dabienga gita 5th Pay Commission-o pangchake dormaharangko on•na ku•rachakahani gimin Bristibar salo uamangni kam dontongate jingjengataniko ra•galpilaha.
Bristibar salo, Meghalaya a•dokni Urban Affairs Minister Sniawbhalang Dhar baksa tom•e chanchirimangani ja•man SMEA-ni general secretary Paulus Marwein, kobor ra•timgipa manderang baksa agangrikengon, uamangni man•na nangkuenggipa dormaharangko Krismasna skangan matchote on•na ku•rachakahani gimin uamangni kam dontonge jingjengataniko ra•galpilaha ine parakataha.
“Chingni man•na nangkuenggipa dormaharangko changgni dake on•na minister ku•rachakaha aro uan skanggipa bakko ia antini gisepo aro gnigipa bakko Krismasna skang chingna on•na ku•rachakaha,” ine Marwein aganaha.
Shillong Municipal Board-o kam ka•enggiparangni dormaharangko 5th Pay Commission-ni ning•o on•china dabie SMEA, December 1 tarik dipet kamrangko ka•gija jingjengatna a•bachengatahachim.
