Shillong, Nov 29: Meghalaya-o MDA sorkariko rikdilenggipa National People’s Party (NPP)-ni national president aro a·dokni skotong minister Pa Conrad K Sangma, re·baenggipa 2023 bilsio a·doko ong·nasienggipa Assembly election-na pilak tarisamsoanirangko dakengaha ine Mongolbar salo parakataha.
Indake ong·engon, adita sal skang Raksamgre constituency-oni NPP-ni MLA, Pa Benedic R. Marak aro apsan doloni Selsella constituency-oni Ma Ferlin C. A. Sangma-maang sakgnini kam watani gimin sing·anina, Pa Conrad aganchakna jechakenba, maini gimin kam wataha uko na·simang uamango tale ra·na man·gen, uamangni kam watanichi chingna maming ong·ja, maina politics-o, dingtang dingtang dolrango aro bang·a MLA-rangni gisepode iarang ong·telaia aro uamang an·tangtangan chanchie tik ka·ahani gimin anga mamingkoba aganani dongjawa ine skotong minister aganchakaha.
Mikkangchina angni namgipa sikaniko uamangna on·a, ine NPP-ni dilgipa aganangkuenba, a·dokoni je political doloniba uamang susachina, angni namgipa sikaniko uamangna on·a aro chingni dolni gitade chinga mikkangchina re·mikkange kamko ka·angaigen aro sokbaenggipa eleksinnaba chu·gimik tarisamsoaniko dakanggen ine Pa Conrad agandapataha.
