Shillong, June 1: Bristibar salo, Prime Agriculture Response Vehicle-rangko Meghalaya a•dokni Chief Minister Conrad K Sangma, Upper Shillong-o donggipa MAMETI-o a•bachengate on•angaha aro ia garirangko a•bachengate on•na program-ko ong•atanio a•dokni Agriculture Minister Ampareen Lyngdoh, Agriculture department-ni Secretary Isawanda Laloo aro Agriculture department-ni officer-rangba dongpae bak ra•angaha.
Ia Prime Agriculture Response Vehicle-rangko a•bachengate on•anganio a•dokni Chief Minister, jinmana aganprakangengon, batanggimin bilsirango nambata kolrangchi kamrangko ka•enba, gama ge•ani kamrangko tang•doatahani gimin aro game ge•e cha•giparangni man•gnirangko bariatahani gimin Agriculture department-ko mittelpilangaha.
Meghalaya a•doko songdongenggipa manderangoni 80 percent-de game ge•e cha•giparangan ong•a ine janapatengon, game ge•e cha•giparangko dakchakna gita sorkari, bang•bea program-rangko a•bachengataha ine Chief Minister parakataha.
Kamrangko ka•e cha•na cholrangko sandienggipa chadamberangna Agriculture, Food Processing, Tourism aro Service Sector private company-rango cholrangko on•na nangenga ine janapatengon, ia sector-rangon chadamberangna cholrangko on•na man•jagenchimode kamrangko tikate on•na man•jawa ine Chief Minister parakataha.
Da•o changgipino bol 200 Prime Agriculture Response Vehicle-rangko suale on•angkugen ineba ia tom•anio Chief Minister parakataha.
Ia Prime Agriculture Response Vehicle scheme-ara diltugipa songadam nokadamrango game ge•e cha•enggipa manderangna bosturangko salna dakchake on•enggipa scheme ong•a aro ia scheme-ni ning•o bol 200 garirangko, 50 percent subsidy gnang dingtang dingtang cooperative society-rangna, self help group-rangna aro farmers producer organisation-rangna on•enga.
Bristibar salo bol 20 Prime Agriculture Response Vehicle-rangko Chief Minister-ni jakchi a•bachengate on•aha aro ia garirangni chabirangko Khasi aro Jaintia Hills-ni dingtang dingtang dolrangna sualataha.
