Shillong, Jan 24: 14-Pynthorumkhrah constituency-o Trinamool Congress (TMC)-oni susana gita mingako man•gipa candidate Samborlang Diengdoh, ‘chonnikgrikgipa’ politics-o bak ra•na sikja ine pa•sikenba TMC-oni ong•katpilaha.
Re•baenggipa February-ni 27 tariko ong•atna sienggipa Meghalaya Assembly election-o susana gita TMC-ni sak 52 candidate-rangko re•anggipa January 6 tariko parakatmanahachim aro TMC-ni candidate-rangko parakanio Diengdoh-koba Pynthorumkhrah constituency-ni candidate-na mingahachim.
Indake ong•genchimoba, Samborlang Diengdoh, 2018 bilsini Assembly election-o Congress doloni susagipa Banpynshngain Rumnong baksa re•anggipa Sonibar salo, TMC-oni ong•katskaaha.
TMC-oni ong•katani a•selko kobor ra•timgiparangna talatangengon, ua saksa sakgipinko chonnikgrike aro matnanggrikede politics-o ong•na sikja indiba nama kamrangko ka•na skani dongani giminsa TMC-oni ong•kataha ine Diengdoh parakataha.
Ia election-o ua Independent candidate ong•e susaskagen ineba Diengdoh parakataha.
