Shillong, June 20: Indore-oni badinggipa Raja Raghuvanshi-ko so·otani bidingo koborrangko niatgenchimode, Meghalaya Police sakkirangko chu·onge chimonge sandianirangko matchotnasiengaha gita nikna man·enga.
Mongsonggipa matnangako man·gipa Sonam Raghuvanshi aro uni mikchagipa Raj Kushwaha-ko salgnina policerang an·tangtangni jako donkuna bi·aha aro so·otna tik ka·gipa sakgittam, chong·motan – Akash Rajput, Vishal Singh Chauhan aro Anand Kurmi-ko pattok-ona watataha.
A·dokni Police dolrangni sakkirangko chimonge Indore-oni re·bapilani ja·mano, Raja-ko so·otna tik ka·gipa sakgittamko, obostani kri nanggenchimode police-ni jako donpilna man·gen, uandake ia obostani bidingo mongsonggipa sandianirangkode dakmanaha ine nikna man·enga ine East Khasi Hills-ni Superintendent of Police Vivek Syiem aganaha.
Indiomangba, siani somoio Raja-ni gangipa sona aro hira baksana, uni siani ja·mano Sonam-ni jakkalgipa gnigipa mobile phone-ko Meghalaya Police man·kujaenga aro krenge sandianirangko dakangkuenga.
Ia mobile phone aro gamchatgipa gananirangko Raja-ko so·otani ja·mano May 26 aro June 8 tarikrangni gisepo Sonam-ni dongchakegipa noko ong·gen ine Indore-ona re·anggipa police dolrang chanchiachim, indiba ua nokona re·ange nieon, saoba unoni bosturangko jitangaha ine nikna man·aha. Uandake sawa ua bosturangko ra·angaha aro da·o bano donenga policerang sandina jotton ka·enga ine SP Syiem parakataha.
Indore-ona re·anggipa police dolrang da·o sakkirangko sandiana agreba, June 8 tariko Sonam-ko Indore-oni Varanasi-ona gari salanggipa mande sakgniba ia obosta ong·anio jak donga ine chanchichipe, uamangko sandie saksako sing·anirangko dakna jotton ka·aha. Koborrangko man·soani gitade, uamangko Ujala Yadav minggipa me·chik saksa Varanasi bus station-o nikaha, jean Gorakhpur-ona re·anggipa bus-oba Sonam baksa apsan asongman·achim. Am·sandie niani ja·mano ua sakgni me·asarangara travel agency ge·sani gari salgiparangsa ong·aiachim aro Sonam-ko Varanasi-ona salange donna Raj uamangko tik ka·atahachim ine u·ina man·aha.
Sonam-ni adatang Govind Raghuvanshi aro uni ma·gipakoba sing·doanirangko dakaniba matchotaha. Una agreba, Truecaller app-o ‘Sanjay Verma’ ine nakatgipa bimungara tol·e dongipasa aro ua number-ra Raj-nin ong·a aro Raj aro Sonam-ni gisepo bang·a phone call-rang donga ine SP Syiem parakataha. Uandake, Sonam aro Raj-ko Sonibar salo kachari-o mikkang pa·ataniko dakanggen.
“Matnanga man·giparangko sal-gni police-ni ning·o done kamrang matchotani ja·mano, chinga sandie man·giminrangko namdake nianiko dakgen aro nanggenchimode, uamangko police-ni ning·o donna salrangko ra·dapgen,” ine Syiem agandapaha. Uandake da·o Raja-ko so·otanio obosta gimikko u·ie ra·na che·em che·em sing·doe ra·anirangko dakangkuenga ineba ua u·iataha.
Raja Sonam-ko May 11 tariko Indore-o bia ka·ahachim, indiba uko May 23 tariko Sohra-ni Wei Sawdong Falls-o so·otaha aro uni sogimin manggisiko Falls’-ni parking lot-ni sepango donggipa a·silangoniko man·aha. Matnangako man·gipa sakbri – Raj Kushwaha, Vishal Singh Chauhan, Akash Rajput, aro Anand Kurmi-ko Madhya Pradesh aro Uttar Pradesh-ni dingtang dingtang bakrangoniko June 8 aro 9 tarikrango rimvaha aro 9 tariko Sonam an·tangan Uttar Pradesh-ni Ghazipur a·jani nandganj Police Station-o an·tangko bame on·aha. Uamang sakbongakon June 11 tariko Shillong-ona rim·bae sal 8-na police-ni ning·ao donaha.
Na·simang ia video-koba nina man·gen:
Na·simang iakoba poraina man·gen: Bandarigre Sec. School-ni skigipani kosako NGO-rang matnanga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
