Tura, Oct 8: Rajabala Assembly constituency-ni bye-election-o susana gita Sukrobar salo United Democratic Party (UDP)-ni candidate Ashahel D Shira, Tura-ni DC office-o nomination file ka•angaha.Shira-ni nomination file ka•anio Meghalaya a•dokni Home Minister aro UDP-ni dilgipa Lahkmen Rymbui, Ranikor-ni UDP MLA Pius Marwein, Baghmara-ni UDP MLA Samuel Sangma aro UDP-ni gipin dilgiparangba dongpaeaha.Shira-ni nomination file ka•angani ja•man UDP-ni dilgipa Lahkmen Rymbui, kobor ra•timgiparang baksa agangrikengon, Shira ia apsan constituency-ni MDC ong•engani gimin aro ia apsan constituency-nin gitcham MLA-ba ong•ani gimin ia bye-election-o UDP chegipa ong•na ka•dongenga ine parakataha.

UDP-ni candidate Ashahel D Shira, 2013 bilsioni 2018 bilsiona Rajabala-ni MLA ong•ahachim indiba 2018 bilsini Assembly election-o ua Congress dolni candidate Dr Azad Zaman-ni jako amako man•rikahachim.

“MDC election-o manderang uo ka•donge uko seokaha ine chinga nikahani gimin ia bye-election-oba chinga chegipa ong•na ka•dongenga,” ine Rymbui aganaha.A•dokni mongsonggipa opposition Congress dolni gisepo meligrikgijanirang dongani giminba UDP ia bye-election-o chegipa ong•na ka•dongenga ineba ua aganaha.

Home Minister-ni aganani gitade, Rajabala constituency-ara dingtang dingtang jatrangni songdongchakram ong•e namen dingtanggipa constituency ong•a aro ian election-o susaenggipa uamangni candidate-na ra•biani ong•enga.

“Uni giminsa Rajabala-ni manderang, sorkario ong•enggipa dilgipako nangenga maina uasan uamangni neng•nikanirangko namatna jotton ka•gen,” ine Rymbui aganaha.

Rajabala bye-election-o National People’s Party (NPP)-ba candidate-ko susaatengani a•sel UDP baksa susagrikna nangengani gimin janapangengon, ia dolgnian sorkario nangrime kamko ka•enga indiba politics-ni kamrangko ka•aniode dolgnian jakgitel ong•aia ine Rymbui parakataha.

HNLC bobil dolni ka•mikkenatgipani bidingo janapatengon, police-rang an•tangtangni dakna nanganiko dakenga aro nangani kri ja•kurangko de•angaigen ine Home Minister parakataha.