Agartala, Oct 8: Congress dolni bang•a dilgiparangan Trinamool Congress (TMC)-o napna senge dongtokengon, Tripura a•doko Congress doloni ong•katgipa mitam membor-rang, gital Tripura Democratic Front (TDF) dolko bikotskaaha.
Tripura a•doko Pradesh Congress-ni gitcham president Pijush Kanti Biswas, vice president Tapas Dey, general secretary Tajen Das, Youth Congress-ni gitcham state president Pujan Biswas aro ia antini a•bachengachibara Congress doloni ong•katgipa mitam dilgiparang nangrime ia gital dolko bikotaha.
BJP-chi sason ka•enggipa Tripura a•doko dingtang dingtang mongsonggipa dolrang, doltangtangko bilakatna gita rakbee kamrangko ka•tokengon, antignina skangsan Congress-ni president Sonia Gandhi, mingnamgipa ukil Biswas-ko ra•galenba, gitcham minister Birajit Sinha-ko gittamgipa changna state president songskaahachim aro unbaksana sakbonga dilgiparangko working president songahachim.
Indake ong•engon, Congress dol baksa bilsi 50 ba bilsi 60-mangna apsan kamrangko ka•rimani ja•man da•o uamang, a•doko songdongenggipa manderangni namgnina Congress doloni ong•kate gital dolko bikotskana nangaha ine TDF-ni mongsong dilgipa aro advisor Biswas parakataha.
TDF-ni executive committee-ko uamang bakan jinmana parakatgen ine TDF-ni president-na mingako man•gipa Pujan Das parakatskaaha.
