Tura, Oct 25: Rajabala bye-election-na campaign-ko ka•na gita Meghalaya a•dokni Chief Minister aro National People’s Party (NPP)-ni national president Conrad K Sangma Sombar salo Rajabala constituency-ona sokbataiaha aro Sombar salo ua ia constituency-ni song damgnio, chong•motan Chokchokia aro Bhaitbari songrango NPP-ni candidate Abdus Saleh-na campaign-ko ka•angaha.
Ia song damgnio Chief Minister-ni campaign ka•angani somoio Meghalaya Legislative Assembly-ni Speaker Timothy D Shira, a•dok sorkarini Chief Whip Marcuise Marak, MLA Ferlin Sangma, GHADC-ni CEM Benedic Marak aro GHADC-ni Chairman Rakesh A Sangma-ba dongpae bak ra•angaha.
Kobor on•ani gitade, a•dokni Chief Minister, re•baenggipa October 27 tarikona kingking Bhatabari-o donge Rajabala constituency-ni a•brirango aro a•kawe jolrangoba campaign ka•angna gita sienga.
Ia song damgnini manderangna a•dokni Chief Minister Conrad Sangma, aganprakangengon, NPP-ni candidate Abdus Saleh-na pu•onchina gita manderangko didiangaha.
NPP-ni candidate Abdus Saleh, A•chik ong•jagenchimoba A•chikrangni dakbewal rikbewalko tale ma•sigipa ong•ani gimin ua A•chikrangnaba apsan daken dangdike on•anggen ine Sangma parakataha.
Congress dolni dilgiparang da•o pripratokaha aro Congress dolo da•o dilgipana namen dilengaha ineba ia tom•anio Conrad Sangma aganaha.
Congress dolo mikkangchina maming ka•donganirang dongjahani gimin manderang Congress dolni agananirangko bebera•gija Meghalaya a•doko sorkariko chalaienggipa NPP-nasa pu•onna nanga ineba ua aganaha.
Bye-election ong•enggipa a•dokni damgittam constituency-rangon NPP bilakbatenga aro ia damgittam constituency-rangon NPP chegipa ong•gen ineba NPP-ni national president parakataha.
Ia tom•anio NPP-ni candidate Abdus Saleh-ba jinmana aganprakengon, Rajabala constituency-o pilakni gitan namroro silroroaniko ra•bana gita ku•rachakangaha. Ua an•tangni ku•rachakanirangko chu•sokatna man•jagenchimode Chief Minister aro NPP-ni gipin MLA-rang uko dosi changen ineba Saleh aganaha.
