Tura, March 4: Rajabala constituency-ni Congress MLA Dr Azad Zaman, da·al Bristibar pringwalo a·gilsakko watangaha.
Kobor on·timgiparangni u·iatani gitade, Dr Zaman rang·gitik ka·tongni saaniko man·enba, da·al Bristibar pringwalni 2:30 bajimango a·gilsakko watangaha. Ua bilsi 47 ong·ahachim.
Rajabala MLA-ni siangani ja·man Meghalaya a·dokni Chief Minister Conrad K Sangma, an·tangni kalimpaaniko parakataha.
“Rajabala-ni MLA Dr Azad Zaman-ni rang·gitik sianiko knasoe anga namen ka·a be·aha. Garo Hills-ni a·kawe jolo saksa chadambe dilgipa ong·e ua manderangni namgnina an·tangko on·kange kam ka·gipa ong·achim. Uni nokdangna aro uni pilak ka·sagiminrangna anga angni kalimpaaniko on·enga. Uni janggi tom·tomao neng·takchina,” ine Chief Minister, social media-o parakataha.
Re·anggipa February jaosan Congress dolni saksa chadambe dilgipa David Nongrum-ba rang·gitik saaniko man·e a·gilsakko watangahachim aro uandaken da·o Rajabala-ni MLA Dr Azad Zaman-ba rang·gitik siangahani gimin ia jagnini gisepon Congress dol, sakgni chadambe dilgiparangko gimaatna nangaha.
