Itanagar, Oct 18: A·gilsakni gisik seng·gipa-matgipa dilgiparangni gisepo gital chanchiani a·barangko on·grikachi mikkangchina nambate ja·kurangko de·chakate kamko ka·na miksonge ia October 19 tarikoni Arunachal Pradesh-o ong·atnasienggipa Regional Conclave ba a·joltangni gita sriksrik tom·anio bakko ra·na gita Meghalaya-ni skotong minister Pa Conrad K. Sangma, Robibaro Itanagar-ona sokeaha.
‘Regional Aspirations, National Outlook’ ine pangchakaniko donenba, National People’s Party (NPP), Arunachal unit ia jani 19 tarik, chong·motan Mongolbar salo Itanagar-ni DK State Conventional Hall-o tom·aniko ong·atenga. Ia tom·bimonganio, kal·susaani, politics, bading-chiwalani aroba minggipin a·barango namen niksenggipa manderang aro dilgiparang bakko ra·e tom·aniko mikkim gnangatnasienga aro ia chimongbagipa manderangni gisepo mikkangchi a·gilsakko nambate rikna gita gital chanchiani a·barangko naate agangrikaniko dakanggen.
Robibar attamo a·dokni skotong songjinmaona sokearin una bang·a nama-sikaniko on·giparang aro chakpagiparang Hollongi check gate Pa Sangma-ko dintangmancha mande ra·bee rimchaksotokaha, jenan Pa Sangma, an·tangko mande ra·bee rimchaksoanina NPP unit-ko mittelpilskae an·tangni twitter-o see parakatskaaha.
Indake ong·engon, Meghalaya-ni skotong minister Pa Conrad Sangma-na agreba, Tripura a·dokni Maharaja Pa Pradyot Debbarma baksana gipinrangba NPP dolni ong·atenggipa sriksrik tom·anio bakko ra·angtoknasienga.
Koborko man·soani gitade, tom·anio, political-o chu·sokna sikani gnang kamrangko ka·e a·joltango chu·sokgipa ong·na nisanko done jotton ka·ani, salgro-salaram a·jolni politics aro pilak ra·bianirang, Arunachal Pradesh a·dokni obostao pangchake torom aro politics-ni gita kamko ka·grikani aro Naga Peace process-ni gimin ning·tue agan-chanchirimaniko dakanggen.
