Shillong, Feb 15: Ri-Bhoi a·jani Sumer-o donggipa MeECL Secondary School-o class 10-o poraigipa saksa bilsi 18-ong·gipa Pynshngaiñ Kurbah, batanggimin salo Madhya Pradesh a·doko chang 5-gipa Khelo India Youth Games-ko ong·atanggipao canoe slalom K1 -o susaangpae silver medal-ko cheeming Meghalaya a·dokna mikkim-rasongko ra·baaha.
Chi ta·rakao ring choone susaanio a·dokna skanggipa medal-ko chebachenggipa Pynshngaiñ kurbah, Megha Kayak Fest-ko bilsianti ong·atchakgipa Whitewater songoni Untrew chibimao Australia-ni saksa kayaker, Ian Vincent-ni nirokatani ning·o skie ra·anirangko dakaha. Indake ong·oba Kurbah, sakgipinrang baksa susagrikani somoiode chu·onga gita ranta ka·samsoanirangko dakna man·skajaha.
Kurbah, creek boat-kosa name chona changbatgenchimoba, canoe slalom kayak-ko skanggipa changna jakkalchenge MP-o ong·atanggipa Khelo India-o susae gnigipa biapo cheenba a·doktangna mikkim-rasongkode ra·bana gita man·skaaha.
