Shillong, Feb 15: Assembly election ong·na mikkang-mikkang, Bharatiya Janata Party (BJP), “Empower Meghalaya – Vision Document 2023” ine pangchakaniko donenba re·bagnigipa salrango a·dokna kamrangko ka·na gita miksongenggipa election manifesto-ko ma·mong BJP-ni padot Pa JP Nadda, Butbar salo Vivanta Shillong-o oprake on·angaha.
Dolni manifesto-ko oprake on·angmitingo, Meghalaya BJP-ni padot Pa Ernest Mawrie, ma·mongni secretary Pa Rituraj Sinha, ianpako susanasienggipa dolni candidate — Pa Sanbor Shullai, Pa AL Hek aro Pa HM Shangpliang-maang gimikan dongpatokaha.
BJP dolni mikkangchi chu·sokatna miksongenggipa kam ba Vision Document 2023-ni ning·o, namgipa sorkariko rikna, daka-rikani aro tourism-ko tang·doatna, game cha·giparangko, me·chikrangko, chadamberangko bil gnangatna, gimiknan apsan namroro-silroroaniko ra·bana, pilaknan apsan sana-bananiko on·na, a·dokni gadangko aro namroro-silroroanio pilak nangchongmotgiparangko tang·doatna gita ku·rachakanirangko on·aha. Indake ong·genchimoba, BJP-ni bilona re·baon ILP-ko a·doko ra·gatna gita ku·rachakgiminkode uamangni kam ka·na miksongenggipao janapani dongskajaha.
Unbaksana, BJP dolni kamko ka·na ku·rachakenggipao, a·doko 7th pay commission-ko ra·gatani, gital district-rang, sub division-rang aro block-rangko songani, Tura-o office-rangko bang·bate kuliani, dingtang dingtang department-ni headquarter-rangko donanirangko man·chapata baksana, a·doko niam gri a·ningni gamko bikotaniko nirikkina Task force-ko songna, kam ka·giparangna somoi gita dormahako on·na, PM Kisan Samman Nidhi scheme-ni tangkako 2000-ona bariatna, Ka Phan Nonglait scheme-ko a·bachengate on·na jeon me·chik bi·sa atchiode, gong 50,000-ni bond-ko on·na, me·chikrangna KG oni Post Graduate-ona kingking damgri lekka-porako on·na, kangal nokdangoni porikkao name chu·sokgipa college-o porainagipa me·chikrangna scooty bolprakko indin on·na aro Bertha Gyndykes Dkhar scheme-ni ning·o be·enni gita bilgrigiparangna sorkarini kamko on·na 33 percent-ko a·kangna gitaba BJP dol uamangni manifesto-o ku·rachakaniko on·angjolaha.
Manifesto-ko oprake on·angmitingo ma·mong BJP-ni padot Pa Nanda-ni parakatani gita, BJP dol sorkariko rikna cholko man·genchimode, a·doko me·chikrarachi kam ka·nagipa police battalion – Phan Nonglait Battalion-ko a·bachengate on·anggen, sanitary napkin-rangko ge·prako gong 1 ka·e bree jakkalna man·na gita sanitary napkin-rangko tariani kolrangko skulrango, college-rango, bajar-antirango aro sorkarini chalaigipa skie ra·chakram biaprango dongen.
Iarangna agreba, jakma-ba·kuni kamo changgipa-sapgiparangna kam ka·e cha·ani cholrangko on·na, kam grigipa graduate ong·gimin chadamberangna bilsio gong 1000 tangkarangko on·e dakchakna, Ujjawala Yojana scheme-ko man·gnigiparangna bilsiprako ge·gni LPG cylinder-rangko on·na gita ku·rachakaniko on·angkua baksana, a·gipi songdongkamgipa buchuma-budeparangni pension-ko bariatna, Ayushman scheme-ko bariatna, a·doko sana-banani cholrangko namdapatna, samrangko altue man·na amna gita block ge·antion Jan Aushadhi Kendra-rangko songe on·na gitaba BJP mikkangchina ku·rachakaniko on·angjolaha.
