Nongpoh, May 09: Mongolbar pringo, Ri-Bhoi a·jani skotong Nongpoh-o wa·al kamgitikanichi ge·sni dokan nokrangko tapra changpile kamaha, indiba rasong gnangbee ia obosta ong·anio darang saksaniba maming a·selko chagronganikode knasoa dongjaha.

Wa·al kama man·gipa dokanrangara dingtang dingtang biaposa ong·a, uanoni ge·bongade Nongpoh town shopping complex-oni ong·a aro bangki ge·gniara Meghalaya Cooperative Apex Bank (MCAB)-ni mikkango donggipa ong·achim.

Wa·al kamengmitingko mikrongtangchi nikgiparangni aganani gitade, obosta ong·miting somoio ua biapo donge kamtangko ka·enggipa Central Reserve Police Force (CRPF) jawanrangsa wa·al kamengmitingo chirangko rudape ba minggipin dakgipa cholrangchi wa·alko kimite galaha.

Ia obosta ong·anina dokan nokgiparang koborna aganangengon, wa·al kama man·gipa dokan ge·prakan lakrangni gita noksan ong·ahani gimin uamang suk ong·gijaniko parakatan baksa, iani bidingo Nongpoh Police station-o uamang mokordomako ka·angna gitaba aganange, ia obostaona sokatgipa manderangni kosako rakgipa ja·kuko de·atchinaba uamang a·dok sorkario mol·molangjolaha.

Minggipinara, ia pilak ong·a obostako sambao donggipa MCAB ATM-o chatgipa CCTV camera-o chipe ra·rika donggniko sandiate nion, ua somoio bijoli dongchangjani a·sel CCTV-ni kam ka·gijanikosa nikna gita man·skaiaha.