Tura, Feb 27: West Garo Hills a·jao Rongram-oni Phulbari-ona dakanggipa ramako apalbatatna gita da·al Sonibar salni bako Meghalaya a·dokni Chief Minister Conrad K Sangma, pangchakaniko songe on·angaha aro ia ramana pangchakaniko songe on·anganio a·dokni Deputy Chief Minister Prestone Tynsong, Power Minister James PK Sangma, North Tura-ni MLA Thomas A Sangma, Phulbari-ni MLA SG Esmatur Mominin aro dingtang dingtang department-ni officer-rangba dongpae bak ra·angaha.
Ia kilometre 60 ong·gipa ramako taridapna gita sorkari, gong kror 132.20-na baten tangka paisarangko chame on·aha aro ian Rongram Bazar-o donggipa NH-51 ramani 85-gipa km-oni a·bachenge a·brirang gita Phulbari jillani AMPT ramao nangdimegen.
Ia ramani ning·o dam 40-na baten songrangko man·e ian manderangni re·a doaniko altubatatna dakchakanisan ong·aigija, songo noko manderangni game ge·e man·gipa bosturangko watna aro dingtang dingtang kamrangko ka·anio bang·en namgni ong·gnok.
Ia ramako tarina gita pangchakaniko songe on·angani somoio a·dokni Chief Minister jinmana aganprakangengon, ia Rongram-Phulbari Hill ramara West Garo Hills a·jao gitchambatsranggipa aro mongsonggipa ramarangoni dilsa ong·e Tura-oni Phulbari jolrangona re·ruraenggipa manderangna janggi tangani chol gita ong·a aro da·o ia ramako taridape on·anichi manderangni re·a doaniosan ong·aigija dingtang dingtang kamrangoba manderangna namgni ong·gnok ine parakangaha.
An·tangni pagipa PA Sangma sagiko gisik ra·atpilengon, “Ia ru·utbea bilsirangna galchipako man·gipa ramani gimin angni pagipa sagi angna aganrongachim aro ua ia ramako uni somoirangon taridape on·na nangnikahachim. Da·alo uni ia nikjumanggipa kamko chu·sokate dam 40 songrango songdongenggipa manderangni namgnina ia ramako chingni sorkari tarie on·na man·engani gimin anga namen kusi ong·a,” ine Chief Minister parakataha.
Meghalaya a·doko rama jal·langrangko namdapatanian ia sorkarini mongsonggipa daito ong·enga aro batanggimin bilsi gittamni gisepo ia sorkari, Garo Hills-ni rama jal·langrangko tarina gita gong kror 1800-na baten tangka paisarangko chamataha ineba Sangma aganaha.
Meghalaya a·doko rama jal·langni kamrangko nambatatna gita krenge kamko ka·dilengani gimin ua a·dokni Deputy Chief Minister aro PWD Minister Prestone Tynsong-koba mittelpilangaha.
MDA sorkarini kamrangko mittelpile aganangengon, “2018 bilsina skang PMGSY ramarangko tarianirang namen namsrangjachim indiba MDA sorkari jako ra·a intalan a·doko bang·en dingtanganiko nikna man·aha. Da·o Meghalaya a·dok gimiko gong kror 2800-ni PMGSY ramarangko tarienga,” ine Chief Minister parakataha.
Ia ramako 2022 bilsini December jao matchotna man·na gita kamrangko nirokjringchina gitaba ua deputy commissioner aro PWD-ni official-rangko ge·etangaha.
Ia ramana pangchakaniko songe on·anio a·dokni Deputy Chief Minister Prestone Tynsong, Power Minister James PK Sangma aro gipinrangba jinmana aganprakangaha.
