Shillong, April 17: Meghalaya a•doko Lok Sabha Election-na salsa aro adita kontarangsanjok, indake ong•engon Meghalaya-ni Chief Electoral Officer (CEO), a•doko jakgitel ong•e aro kakket ong•e pu•onaniko ong•atasan ong•aija indiba, songni nokni dilgiparangkoba apsan bakrime kamko ka•enba rongtalgipa an•talgipa election-ko ong•atna okamchimonganiko dakangaha.
Indake ong•engon, rongtal an•talaniko rakkina gita mikkango donge kamko ka•na gita Asia-ni rongtalbatsranggipa song Mawlynnong a•bachengate on•angaha jeon pilak dambe pante metrarang, North India Church-ni chalaienggipa songni skul nok, jeon pu•onchakaniko dakatna siengachim ua biapko rongtalataniko dakangaha.
Iako a•bachengatanina, Mawlynnong-ni Rangbah Snong, Thomlin Khongthohrem, “CEO aro Election Department-ni gita chingni polling station-ko rongtal an•talatna gisikko on•enganina namen katchabeani ong•a, maina ian ong•na sienggipa election-na kam ka•anirango kakket aro rongtale, tangka paisani bil aro boksis on•e vote on•ani gri ong•gen,” ine aganangaha.
Shillong-ni rongtalbatgipa gittim Nongrum Hills-ni Rangbah Snong saksa, Bantyllilang Narry, ” ia rongtal an•talaniko anching name rakkina aro manina nanggen, maina ian election badea jamanba polling station biaprango aro sambajolrango jabolrangko ba plastic jakkalanirangko nikjawa. Vote pu•onani jekai anching sakantini daito ong•a uandake, samtangtango donggipa bol wa•arangko simsak nirokaniba anchingni daito ong•a,” ine aganangaha.
Ia chango, CEO, ge•sa ku•mitchetaniko dakatenga, jeon polling personnel-rang songni manderang baksa polling station-rangko rongtal an•talataniko dakdilanggen. Iako dakaniara, voter-rangna u•iatanikosan on•aia ongja indiba, pu•onani salna dingtang dingtang kamrangko ka•enggiparang kamko ka•engon, rongtal an•talaniko aro samtangtango donggiparangko nirok simsakaniko gisiko don•e kamrangko ka•a.
Ia ku•mitchetanio, “election-o bak ra•engon dangdike on•giparang gita samtangtango donggipa biaprangko rongtal an•tale rakkiani, gamchata u•iataniko on•enba songdong achaenggipa manderangni kamrangko namdapatani, pu•onchina on•enggipa boksisrangko jegale pu•onanio kakket ong•aniko rakkiani baksana samtangtango donggiparangna simsakani, torom ba jat ba ku•aganio baseani grigipa voter ong•na ku•mitchetani ong•a.”
“Iako ong•atani miksonganiara, ong•telaigipa gamrangna simsakaniko dakna gita dolgniko chongmotan Polling personnel-rang aro songko nokko dilgiparangko bak ra•atna ong•atangaha maina anching iarangon pangchake janggi tangenga. Anching mikkangchini gimin chanchie vote ka•genchim ong•ode, ia samtangtango donggiparang anchingko anseng baljoke rakkianio mongsonggipa ong•gen.” Ine Meghalaya-ni Chief Electoral Officer, Dr BDR Tiwari, janapataha.
BDR Tiwari, a•doko songdong a•chaenggipa pilak manderang baksana pilak political party-ni dilgiparang, me•chikrang aro chadamberangko ia Lok Sabha Election-na rongtal an•talataniko dakanio re•bae bakko ra•china molmolataha. Ia Lok Sabha Election-ara gipin a•dokni election-rang gitam apsan gamchatgipa ong•ani gimin, antangtangni man•gimn bilrangko jakkale re•bae pu•onaniko dakchina didiataha.
Na·simang ia video-koba nina man·gen:
Na·simang iakoba poraina man·gen: WGH-ni dam 292 polling station-ona polling official-rang re•chakatanga
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter-twitter.com/nemediahub
Youtube channel- www.youtube.com/@NortheastMediaHub2020
