Shillong, May 19: Roster system-ara maikai kam ka•achim, uko talate on•na gita Sukrobar salo a•dok sorkari, pilak political dolrangkon okamchimonge, Shillong songjinmani Secretariat Yojana Bhawan-o tom•aniko ong•atangaha aro ia tom•anio HSPDP, BJP, TMC, Congress, VPP, KHNAM, UDP aro NPP dolrang bakko ra•angtokaha.
Tom•a matchotani ja•mano kobor ra•timgiparangna talataniko on•angengon, ia tom•anio roster system-ni gimin sorkarini talataniko nike bang•bata political dolrangan chu•ongnikaniko paraktokaha ine Chief Minister Conrad K Sangma parakataha.
Ia tom•anio mitam dolrang, an•tangtangni chanchianirangko aro sing•na nanganirangkoba sorkario sing•e ra•tokaha aro ia political dolrangni ku•pattianirangkoba sorkari ra•e, iana dingtangmancha Cabinet Minister Ampareen Lyngdoh-ni dilanichi committee-ko songgen aro ia committee-o pilak political dolrangan bak ong•gen ineba Chief Minister parakataha.
Ia committee kamrangko ka•e report-ko on•kujaskal, gital kamna advertisement on•aniko dontongatchengna gitaba sorkari tik ka•angaha ine Sangma parakataha.
Chief Minister-ni parakatani gitade, roster system-ara kamna seokanio ja•rikna dongimin niamsan ong•aigen aro ian lekka porani kamrangnade miksonge ra•gatgipa ong•ja ineba ua, dingtang dingtang dolrangni sing•anirangna talate on•angaha.
1972 bilsioni kamna seokanirangko reservation policy-o pangchakesa dakahani gimin pilakan matchotmanaha aro sorkarini gita niamko ja•rikanian ong•aha ineba ia tom•anio Chief Minister, political dolrangna talate on•angaha.
Voice of the People’s Party (VPP)-de sorkarini talate on•aniko chu•ongnikjae, ia tom•aoni ong•kate katpilskaahachim ine nikna man•a.
