Shillong, May 19: Roster system-o darang jatkoba mikkang niteani dongja aro ia bewalkon a•doko ja•rikangkuna gita nanga ine Sukrobar salo, dingtang dingtang political dolrangni tom•anio dongpae bakko ra•ani ja•man, Congress dolni dilgipa Ronnie V Lyngdoh parakataha.
Ia tom•anio Roster system-ni gimin Chief Minister Conrad K Sangma-ni talate on•anio chu•ongnikaniko parakatengon, roster system-o darangkoba mikkang niteani dongjani gimin ia apsan bewalkon a•doko ja•rikna gita nanga ine Lyngdoh parakataha.
Ia tom•anio Trinamool Congress (TMC)-ni dilgiparangba bakko ra•angtokaha aro roster system-ko batanggimin somoirangoni ong•gija mikkangchinasa tarichina ku•pattianiko on•angskaaha.
Roster system-ni gimin Chief Minister-ni talate on•aniko TMC-ni dilgipa Zenith Sangma-ba chu•ongnikaniko parakatengon, sorkarini mesoke on•ani gitade ia roster system-ara poraigiparangnade maming nangchakeani dongjawa indiba kamna ra•aniosan ong•aigen ine parakataha.
