Shillong, June 28: Re·baenggipa sal-chikkingrangni gisepon lak 2 mang ong·na am·e Covid sajinmani tikarangko a·doko man·sona gita ka·dongsoenga ine skotong minister Pa Conrad K. Sangma, Sombar salo kobor ra·timgiparang baksa agangrikango parakataha.
Pa Sangma-ni u·iatani gita, a·doko da·o sajinmani tikarang pong 90,000 rangni gita gnang aro ge·gipin pong 40,000 tikarangkoba salgni ba salgittamrangni gisepon man·sogen.
“July jani skanggipa antio ba ia ja bon·achibarade, pong lak 1 baten tikarang an·chingni a·doko chu·ongen donggen ine talatan baksa, ba re·baenggipa salsni ba sal-chikkingarangni gisepode a·doko gimik-gimang pong lak 2-rangni gita tikarang chu·ongen donggnok,” ineba Pa Sangma agandapaha.
Sajinmani tikarangko manderang baditana kingking su·na gisik nanga uno pangchakesa India sorkari tikarangko on·atenga ine talatengon, tikarangko su·anio chu·sokenggipa a·dokrangde tikako bang·bate man·gen ine skotong minister parakataha.
Indake ong·engon, sajinmani giproroanichi a·dokna koros ong·gipani bidingo sing·anina aganchakanio Pa Sangma-ni aganani gita, skanggipana bate gnigipa chango sajinmani sokbataigipao koros ong·anirang aditan komiskaaha.
“Re·anggipa bilsiode gong kror 40 baten koros ong·angaha indiba ianpakde uanona sokdosrangkuja. Ia bilside chinga korosko komiatna jotton ka·aha, beben a·doko tangka-paisako man·ani aro dakchakanina tiktaksan chamani aro manderangna dakchakanirangko on·ani gisepo apsangrik ong·anide pangnan dongaiaha,” ineba Pa Conrad agandapataha.
