Shillong, Oct 21: National People’s Party (NPP)-chi dilenggipa MDA sorkarini kosako tangka paisarangko jakkalsretenga ine Meghalaya Pradesh Congress Committee (MPCC)-ni president Vincent Pala-ni matnangatahani gimin, uamango sakkirang donggenchimode FIR-ko ka•na man•aigen ine Bristibar salo NPP-ni minister Prestone Tynsong ra•biatskaaha.
Shillong-Jowai ramarango dingtang dingtang gate-rangko kulie ia gate-rangko MDA-o bakrimenggipa dolrang, election-o koros ka•na ATM dake jakkalenga ine Pala matnangahani gimin, uo chu•onga gita sakkirang donggenchimode, sorkarini kosako FIR-ko ka•na man•a ine Tynsong ra•biatskaaha.
MDA-o bakrimenggipa dolrang meligrikna man•jaenga ine Congress dolni agananikoba ua raken jegalataha aro iandakgipa kattarangko Pala-ni agananiara an•tangni chanchina changgijaniko mesokanisa ong•enga ine parakataha.
Nangrime sorkariko rikenggipa dolrangoni election-o dingtang dingtang susaaniko champengna gita niamrang dongama ineba ua Congress dolo sing•doangaha.
“Election-na campaign ka•engmiting somoirango matnange agananirangkode manderangan name ma•sibata. MDA-ni kosako Congress-ni matnange agananirangnade ango maming dakeba aiao inmanani dongja,” ine Tynsong aganaha.
Ia by-election-o Congress dol, maming miksonganirang grisa susaenga ineba NPP-ni dilgipa matnangataha.
