Shillong, Nov 19: Ri Bhoi a·jani Bhoirymbong-o donggipa Madan Kurkalang-o salgittamna ong·atanggipa Cherry Blossom Festival, Robibar salo nambee matchotangaha.
Ia festival ba maniani skanggipa sal, chong·motan November-ni 17 tariko, mikka balwa ta·rakangahani a·sel program-rangko ong·atna man·jahaoba, uni ja·man gnigipa aro gittamgipa salrangode program-rangko maming neng·nikani grian ong·atna man·aha aro ia festival-ona Meghalaya a·dokonisan ong·aigija dingtang dingtang biaprangoniba bang·bea manderang re·bae bakko ra·angtokaha.
Gnigipa salo, baditaba chang Grammy Award man·gipa Ne-Yo, mingsinggipa Hybrid Theory aro dingtang dingtang git ring·giparang, manderangko an·saoatangbeaha aro bon·kamgipa saloba Ireland a·songoni mingsinggipa Ronan Keating baksana Jonas Blue, SANAM, a·doktangni Banjop Sohklet aro gipinrang, namnamgipa gitrangko ring·e manderangko an·saoatangskaaha.
Ia salgittamna ong·atanggipa Cherry Blossom Festival-o cha·ani ringani aro ma·manti bosturangkoba nie ra·na aro brena gita manderang cholrangko man·tokaha.
Ia Cherry Blossom Festival-ko ong·atanichi manderang an·senge rona cholrangkosan man·aiaha ong·ja indiba jolni manderang, dokkanrangko dakanichi an·tangtangna man·dapanirangkoba ra·bana cholrangko man·aha.
Watch
