Tura, Aug 4: Robibar salpaksachibara, Tura-ni samba jolo donggipa Sella Wario chi man•pakanggipa mandeko, SDRF, Police, SRT, Fire & Emergency Service aro songni manderang Sombar pringonin sandina a•bachengpiltaiahaoba, ia koborko seatengmiting somoiona kingkingan man•pilkujaenga.
South West Garo Hills a•jani Sub-divisional Agricultural Officer Teseng M Sangma-ko Robibar salo, uni nokdang baksa Ganol chiringo rona re•angmitingo, Sella Wario chi man•pakangaha aro uko chi man•angaonin songni manderang, dingtang dingtang sipai dolrang baksa uko Robibar wal 7:30 bajimangona kingking sandibeahaoba man•jahachim.
Chio gimaenggipa mandeko Sombar pringonin sipai dolrang, songni manderang baksa sandina a•bachengpiltaiaha indiba Sombar attamona kingkingan uko man•pilkujaenga.
Jolo songdongenggipa manderangni u•iatani gitade, Sangma-ko Robibar salpaksachibara, Ganol chisamo roako nikahachim indiba ja•mano ua chio ga•srotahakon aro uko ta•rakbee jokenggipa chi man•pakangakon ine chanchichipenga.
Ia a•selni bidingo Araimile Police Station, Robibar attamni 3:45 bajimango koborko man•soaha aro koborko man•soa bakan Araimile PS-ni Officer-in-Charge John CH Sangma, an•tangni sipairang baksa ua biapona re•ange, gimagipa mandeko sandina a•bachengataha.
Sangma-ko sandina gita State Disaster Response Force (SDRF), Special Rescue Team (SRT), Fire & Emergency Service, Police aro songni manderangba dakchakanirangko on•aha.
Police officer-ni u•iatani gitade, uamang ta•raken chio gimaenggipa mandeni bidingo Damalgre aro Garobadha-ni police-rangnaba kobor on•ataha.
Robibar walona kingking gimaenggipa mandeko sandianio chu•sokna man•jahani gimin Sombar pring 6:00 bajionin uko sandienggipa dolrang, Pelga Warioni sandina a•bachengattaiaha indiba mikkarang wae, chirang dal•baroroengani gimin aro chirang namen ta•rakani gimin gimagipa mandeko sandianio neng•nikanirangko chagrongna nangenga ine u•iataha.
Gimaenggipa mandeko sandienggipani bidingo West Garo Hills a•jani Additional Superintendent of Police (ASP) Priyanka W Sangma, Hub News-na talate on•angengon, uamang Sombar pringonin Pelga Wari aro ka•majolrangoniko sandina a•bachengataha aro chi ka•majolrangonikoba sandina gita South West Garo Hills a•jani police station-rangna u•iataha ine parakataha.
Robibar attamo, ia mandeni gimagipa biaponi metre 500-mangni gita ka•ma chijolo mande balboako nika ine songni manderangni agananiko knasona man•ahachim indiba ua somoio walahani gimin aro chirang namen ta•rakani gimin police-rang, sandianiko dontongchengna nangaiaha ine Sangma aganaha.
Ia mandeko sandiengmiting somoio manderangko chisamrangona re•angjachina gitaba police official-rang didiataha.
Mikkarang waengkuoba aro chirang ta•rakgenchimoba, mandeko man•kujaskal sandianiko dontongkujawa ineba police official-rang ku•rachakaniko on•ataha.
Na·simang iakoba nina man·gen:
Na·simang iakoba poraina man·gen: Khowang flyover-o rama a·sel ong·anio sakgni sia
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
